Migallen: Si dok ra gyud ang nakahibawo

Monday, August 30, 2010

Jun Migallen
Taym Pa

DAGHAN gyud tinuorang nagbagotbot sa resulta sa away ni Rey “BoomBoom” Bautista ug Alejandro Barrera niadtong Sabado sa Waterfront Hotel Lahug.

Have something to report? Tell us in text, photos or videos.

Maoy gipaabot sa kadaghanan kay main event fight lagi ug Bautista pa gyud, so wa gyud sila mag-expect nga maingon ato ang hitabo.

Updates on President Benigno Aquino III's presidency

Hinuon sagad nila wa mobasol sa duha ka mga fighters kay gipakita man gyud nila ang ilang abilidad ug kaisog. Sinukliay sa kumo, nya magpulipuli lang og ka wingig maoy nakahatag og kakulba dala kahinam sa mga nanan-aw.

Di man sab gyud magpaalakansi si Barrera bisan tuod og lupig siya sa binirahay kay mobawos man sab gikan sa first round ngadto na sa fourth round diin kalit lang giundang ang away.

Kahibawo mo og kinsay ilang gipasanginlan sa ilang kasagmuyo? Ang ring physician nga si Dr. Jose Unabia.

Alang kanila, di pa gyud to angay undangon ang away kay gawas nga nagkanindot na, wa kuno maghatag og kakuyaw ang maong gisi.

Buot nila ipasabot nga, sukwahi sa ubang mga away nga bisan gani og nahilam-os na sa dugo ang kontra ug nagbukad na ang gisi, gipadayon gihapon. Unsa pa kaha to nga wa man mawiwi kaayo ang samad.

Ang nahitabo gud, sa ikaduhang higayon, nahagbong ang mouth piece ni Barrera.

So, gihunong sa makadiyot ang away, aron ipasul-ob kinig balik. Pero samtang naghugas pa sa mouth piece, miagayday ang dugo sa gisi sa tuong kilay ni Barrera.

Hinungdan nga gipatan-aw sa doctor. Hasta kita diri nagtuo nga makaaway ra gihapon kini og balik kay naghinamhinam na usab kitang mosaksi sa sinukliay sa kumo.

Apan miwarawara na man hinuon si referee Tony Peson human pahibaw-a ni Dr. Unabia nga unfit to fight na si Barrera tungod sa kalawom sa samad.

I’m sure kon unsay akong gibati sa dihang di na mapadayon ang away mao usab kini ang gibati sa kadaghanan sulod sa Ballroom sa Waterfront. Kasagmuyo. Naputol ang kahinam.
Nabitin.

Pero wa tay mahimo. Decision man sa ring physician. Pilit natong dawaton.

Si Dr. Unabia ra ang nasayod kon tinuod ba gyud nga maghatag og peligro ni Barrera ang maong samad o kaha aduna siya laing katuyoan o rason nganong angay nang undangon ang away.

Apan kuyaw og maoy magpermi. Makatagam sa paying public. Makadaot sab sa promosyon.

Sayang ang effort sa promoter nga mao unta ang paghatag og katagbawan sa paying public unya bitinon lang nga gani ang mga tawo wa makombinser sa rason.

Pero sa gikaingon ko na, ang doktor ra gyud ang nasayod niini. Wa tay mahimo bisan og killjoy pa ang desisyon. jjunmigs0622@yahoo.com