GIHAGIT ni Acting Cebu City Mayor Michael Rama ang mga tawo nga nagpakatap sa estorya nga hinganlan ang konsehal sa dakbayan nga giingong nasakpan sa iyang asawa nga nakigrelasyon sa usa ka sakop sa Mayor’s Management Team (MMT) aron makamando siyag imbestigasyon niini.

Apan, si negusyante Jonathan “Atan” Guardo mihagit sa mao nga konsehal sa pag-resign sa katungdanan kay di siya angay nga mohupot niini.

For updates from around the country, follow Sun.Star on Twitter

Matod ni Rama nga kon mahinginlan kon si kinsa kini nga opisyal unya adunay mobarog nga testigo di siya magmakuli sa pagsusi sa pasangil.

Ang acting mayor nihulagway nga “hearsay” ang estorya kay wa may ngalan nga nitumaw.

“Maayo nga mogawas gyud ang ngalan aron mosugod tag imbestigar,” dugay padayag niya sa Sun.Star Superbalita kagahapon.

Iyang gipahibawo nga mamahimo ang committee on laws sa konseho maoy moimbestigar niini.

Apan, kasaligang tinubdan nga usa ka opisyal usab sa City Hall nitumbok nga daghan nang mga piniling konsehal sa siyudad ang nagkabuwag na sa ilang mga asawa nunot kay may lain kining mga babaye.

Nitumbok siyag upat ka mga konsehal nga giingong kasamtangang di maayo ang ilang relasyon sa ilang mga asawa. Gani, ang uban niini nagbuwag na gyud.

Nasayran, nga gikataho nga kining konsehal nga nasakpan sa iyang asawa nibisita sa boarding house sa usa ka sakop sa MMT ug didto nahitabo ang konprontase.

Giingong gipusposan og balde sa asawa ang opisyal tungod sa kapungot niini sa gihimo sa iyang bana.

Samtang, si Guardo nihulagway sa hitabo nga “scandalous kaayo na, same ang magnitude sa Katrina-Hayden Kho sex video.”

“He should resign. He is tainting the integrity of the office,” matod ni Guardo sa interbyu sa Sun.Star Superbalita.

Tungod sa hitabo, matod niya nga ilang ilakip sa oposisyon ang moral integrity sa pagpili og kandidato sa konseho sa siyudad sa Sugbo.

“Mao nang di sab gyud ko mobalhin og BO-PK. Lain kaayo nga makigkuyog tag labayon og balde,” dugang sa negusyante nga maoy makig-atbang kang Mayor Tomas Osmeña sa pagka kongresista sa south district.

Matod niya nga di gyud mahitabo nga mobalhin siya sa BO-PK, sukwahi sa gipalutaw sa mga barangay kapitan sa southern Cebu city.

“I am already set to run for Congress. I’m still with the opposition and I will always be with the opposition,” matod ni Guardo. (JECT/REV)