Mipetisyon aron mayor nga gikihag rape dad-on

Thursday, September 2, 2010

NIAWHAG sa korte ang mga abogado ang giingong biktima sa pagpanglugos sa mayor sa lalawigan sa Palawan nga ipasusi sa usa ka mananambal ang akusado ug kon maayo ang iyang panglawas, ipadala na siya nganhi sa Sugbo.

Si Atty. Joyce Evidentes Moran, abogado sa biktima sa lugos, nisang-at og motion to conduct independent examination and to transport accused to Cebu City alang kang Rizal Palawan Mayor Nicolas Montaño Sr. kagahapon sa sala ni Regional Trial Court (RTC) Judge Gilbert Moises.

Have something to report? Tell us in text, photos or videos.

Updates on President Benigno Aquino III's presidency

Nalatid sa mosyon ni Moran nga nag-awhag kang Moises nga momando nga ipaubos sa medical examination si Montaño sa medico legal division sa National Bureau of Investigation (NBI) 7.

Unya kon di sila pwede, mamahimo nga ang City Health Officer sa Puerto Princesa City, Palawan ang mopahigayon ug kon supak gihapon sila, ang medico legal officer na lang sa Philippine National Police.

Laing gihangyo niya sa korte nga kon masuta nga mamahimo nga makabiyahe ang akusado ug maayo ang kondisyon sa iyang panglawas ibalhin na siya sa dakbayan sa Sugbo.

Ilang gitumbok nga dihang ang mayor gisikop ug paingon nang dad-on dinhi sa Sugbo giingong si Palawan Provincial Legal Officer Winston Gonzales nidemanda nga ang akusado ipaubos sa medical examination kay giingong nagsakit ang dughan.

Gidala ang akusado sa tambalanan diin nalandig siya hangtod sa Septiyembre 1.

Ang mosyon nibutyag nga nipadala silag doktor sa tambalanan aron mosusi kang Montaño apan nasayran nilang gibalhin na kini sa AFP Western Command Hospital nga wa nila pahibaw-a ang korte.

Samang doctor ilang gipadala sa AFP Western Command Hospital apan gidid-an kining makasud sa tambalanan busa wa sila makakuhag impormasyon sa tinud-anay nga sitwasyon sa mayor.

Sa iyang bahin, si Atty. Joey Wee, abogado ni Montaño, nga nahinabi sa GMA Balitang Bisdak kagahapon nipahibawo nga wa matuman ang “due process” sa pagsikop kang Montaño.

Nitataw si Wee wa man lang gani padalhig subpoena ang iyang kliyente bahin ning giingong kasong pagpanglugos nga iyang giatubang.

Nitumbok siya nga katapusang nianhi sa Sugbo ang iyang kliyente niadto pang 2006 samtang ang gipasangil nga reklamo ning tuiga nahitabo.

Kining mayor nag-atubang ning kasoha tungod sa pasangil sa usa ka manikurista nga gilugos siya ni Montaño niadtong Hulyo ning tuiga sa dakbayan sa Sugbo.