Mongaya: Greenpeace ug Facebook

Monday, September 6, 2010

NAHIMUOT ko niining balita nga ang Greenpeace nangampanya nga ang bag-ong data center sa Facebook didto sa Oregon, USA, kinahanglang mogamit og renewable energy ug mosalikway sa coal plants isip tinubdan sa kuryente.

Matod pa sa Greenpeace nga ang Facebook wa kuno makasakay sa trend karon sa mga technology-oriented nga mga kampanya sa kalibutan. Unya, niabot og 500 mil ka Facebook users ang nisuporta sa Greenpeace.

Have something to report? Tell us in text, photos or videos.

Updates on President Benigno Aquino III's presidency

Niingon dayon ang Greenpeace nga tungod kay wa motuo ang mga tawo, nirisgo kini nga maalkansi. Tingale kay mokampanya sab ang Greenpeace nga mamalhin kining 500 mil?

Nahimuot ko kay hangtod karon man gud, ang mga teknolohiya alang sa paggamit sa renewable energy sources sama sa adlaw ug hangin (solar ug wind energy) di pa gyud ma-himo alang sa dinagkong gamit.

Di man tinuod intawon nga ang renewable energy mahimo nang iilis sa coal-fired plants sa pagkakaron. Naa ra man kana sa hunahuna ug mga istorya sa mga militanteng environmentalist. Di man sila makahatag og practical nga alternatibo.

Hangtod moabot ang igong teknolohiya sa solar ug wind energy nga barato ug kasaligan (di mo-awp-awp ug dunay igong kakusgon 24/7), kuyaw gyud nga makaproblema ang Facebook data center kon kini ang ilang buhaton.

Kuyaw nga magsigi na lang og down ang sistema sa Facebook ug mawad-an sila hinuon og mga mogamit nga mas daghan pa sa 500 mil nga nisuporta sa Greenpeace.

Mas maayo tingale kon kining 500 mil nga nagsuporta sa Greenpeace mag-ipon og pundo alang sa research and development kabahin sa renewable energy ug unya na sila magtagawtaw kon mahinog na ang teknolohiya sa renewable energy.

Tinuod dunay kadaot sa kinaiyahan ang coal plants apan kon ato sab kining pagngon dayon, mosamot kayawa ang kahimtang sa atong ekonomiya.

Sa pagkakaron, ang saktong iduso sa mga environmentalist mao ang “multiplicity of energy sources” aron masuportahan ang bag-ong teknolohiya apan di sab masakripisyo ang atong ekonomiya.

Subay kini sa konsepto nga sustainable development. Ambot lang.

Dugay na man kining maong konsepto apan morag wa man gyud makatuhop ngadto sa mga militante nga mga environmentalist.

Mao nga nalipay gyud ko nga di lang diay kining mga kaalyado sa Greenpeace ang mga environmentalist dinhi sa Sugbo.

Ang akong buot ipasabot mao kining dakong alyansa karon nga nagduso sa pagsaulog sa gitawag nga Earthdance Festival nga usa ka kalibutanong kalihukan ug ang Sugbo mosalmot niini karong buwana.

Karong Septembre 18-19, 2010 ipahigayon ang Earthdance ug gawas sa mga tunghaan, atong nasayran nga nisuporta na ang mga local government ug duna pay mga power company.

Manghinaot lang sab ko nga ubay-ubay unta ka mga kompanya nga nagduso sa renewable energy ang mosalmot sa maong kalihokan aron ma-popularize sab kini.