MAHIMO nang malantaw karon, basi sa mga survey sa mga presidentiable, nga molambo ngadto sa bangi tali sa Liberal Party (LP) ug Nacionalista Party (NP) ang umaabot nga piliay.

Nakita na nato nga nawagtang sa passing si Chiz Escudero ug layo nga number three sa mga survey si kanhi presidente Joseph Estrada.

Samot nga layo kaayo si Defense Secretary Gilbert “Gibo” Teodoro nga, gawas nga wa mailhi sa masa, magpas-an pa gyud sa dakong krus nga mao ang pagdepensa sa administrasyon ni Presidente Gloria Macapagal Arroyo.

Sun.Star accepts donations for victims of Typhoon Ondoy

Nakahisgot na ako kaniadto pang 2008 niini apan ang nakalahi lang kay si Sen. Mar Roxas pa ang standard-bearer sa LP.

Niadtong tungora, nag-una si NP President Manny Villar.

Ang nakalahi karon kay nisulbong pagkalit si Sen. Noynoy Aquino ug nahimo na nga the candidate to beat.

ANG TAWO

Alang kang Sen. Villar, wa siya mabalaka niini kay dako ang iyang pagtuo nga sa ngadto-ngadto, molutaw nga mas duna siyay kasinatian ug kahanas sa pagdumala kay sa kang Noynoy.

Dako kaayo ang suliran sa nasud ug kinahanglang magdagan dayon ang makanarya sa kagamhanan alang sa mga kausaban sa unang 100 ka adlaw pa lang.

Wa na kunoy panahon nga mag-on the job training pa ang presidente aron di matikyaob ang atong nasod.

Gitandi ni Villar, dihang nakighinabi siya sa mga sakop sa media diha sa Level 8 kagahapon, nga ang pagka presidente sama ra sa driver.

Gikinahanglan gyud nga makamao mo-drive ang driver.

Di mahimong pa-draybon ang usa ka tawo kon ang makamao mo-drive mao ang iyang mga ginikanan ra.

Tan-awa kon si kinsa ang kandidato ug di kon si kinsay iyang ginikanan.

“What you see is what you get,” matod pa niya.

LOREN

Nagkaanam na ka-klaro karon nga ang maparis ni Villar isip kandidato alang sa pagka bise presidente mao kini si Sen. Loren Legarda.

Klaro na man ang body language nilang Villar ug Legarda.

Apan niklaro si Villar nga iya ra kuno kining ianunsyo.

Sa pagkakaron, usa ka pagsaway batok kang Villar mao ang iyang kakulang sa bise presidente.

Apan kon modayon man gani kining Villar-Legarda tandem, nakaingon ko sa akong kaugalingon nga kanay lig-on.

Nagkahiusa karon si “Sipag at Tiyaga” ug si Climate Change.

Hinuon, makaingon kita nga tagna pa kini nga nagtuo ko nga mao gyud ang mahitabo.

KINSAY MAYOR?

Sunod pangutana karon mao: kinsa man ang kandidato sa mga Nacionalista alang sa pagka mayor sa Syudad sa Sugbo?

Kay ang BO-PK naa na man sa kampo sa Liberal Party (LP) diin ang standard-bearer mao si Noynoy Aquino, atong nadunggan nga gisulayan karon sa kampo ni Villar ang pagdani sa oposisyon.

Matod pa, nagka-miting na sila si Atan Guardo ug Mary Ann delos Santos ug ang mga tawo ni Villarr dinhi sa Syudad sa Sugbo.

Nagtuo kita nga mobiya kini sila sa grupo ni Estrada ug mobalhin ngadto sa NP ni Villar.

Hinuon, di pa gyud kita klaro kon si kinsa ang mag-mayor alang sa grupo ni Villar nga mobangga kang Mike Rama ug Georgia Osmeña.