Anol Mongaya
Panahom

DI sayon nga dunganon nga mag-aktibo sa pagka sakop sa media ug sa usa ka Rotary Club. Nakasulay ko niini dihang nag-aktibo kog kadiyot sa Rotary Club of Talisay pipila ka tuig nga milabay.

Unang dakong problema nako mao ang pagtambong mismo sa mga senimanang tigom matag Miyerkules sa gabii kay magsirado pa ko niadtong tungora sa Sun.Star Superbalita. Way labot kining ubang mga kalihokan nga kinahanglang gahinan og oras ug mga resources nga kasagaran maglisod kita.

For updates from around the country, follow Sun.Star on Twitter

Kining mga kalihokan nga akong gihisgutan mao ang mga community oriented programs nga maoy usa sa mga tumong sa Rotary Club.

Nisuway ko niini sama niadtong pagkuyog sa Cantipla sa kabukiran sa Syudad sa Sugbo aron motabang sa pagtukod sa usa ka school building kuyog sa mga Rotarian nga gikan sa Hawaii.

Sa ngadto-ngadto, wa gyud ko makalahutay. Tingale, moabot ra ang panahon nga di na ko busy niining ubang mga proyekto sama sa pagsulat sa history sa Naga.

Apan nakaya kini ni Ely Baquero sa Sun.Star Cebu dihang niaktibo siya sa Rotary Club of the East pipila ka tuig na karon.

Gani, sa iyang kaaktibo, gi-induct siya nga club president sa miaging Biyernes sa usa ka engrande nga kalihokan diha sa dakong hawanan sa Beijing Room sa White Gold House.

Mas mahinungdanon, di lang mga higala ni Ely diha sa media community ang nipakitag suporta sa iyang pagka president.

Si Press Secretary Cerge Remonde mismo ang nangulo sa mga VIP nga nanambong sa maong induction. Diha sab ang tulo ka mga kongresista nga sila si Kong. Nerissa Soon-Ruiz, Jun Alcover sa Anad party-list, ug Benhur Salimbangon.

Diha sab sa presidential table sila si Customs Collector Boysie Belmonte, Immigration Regional Director Jun Madarang, Undersecretary Paul Auminal sa PDEA.

Naulahi man ko sa pag-abot sa maong kalihokan kay birthday sab sa akong amahan nga si anhing Doroy Mongaya ug dunay special dinner ang Mongaya clan sa Laguna Garden. Dihang naabot ko, giingnan ko nga duna nay mga dinapit nga nanglakaw.

Apan ako pang nakita ang mga kadagkuan ug mga beterano sa Cebu media nga si Cheking Seares, ang editor in chief sa Sun.Star Cebu; Bobby Nalzaro sa Superbalita, Sun.Star Cebu, DYSS ug GMA 7; Eddie Barrita sa Sun.Star Cebu, Superbalita, ug Philippines News Agency (PNA); ang beteranong photographer nga si Loy Jurado; ug broadcaster nga si Sam Costanilla.

Of course, full force ang mga sakop sa National Press Club Cebu nga ako ang chapter president ug diin si Ely maoy atong vice president for radio. Diha si Johnrey Saavedra sa Banat News, Mitch Palaubsanon ug Fred Languido sa The Freeman, ug Manny delos Santos Rabacal sa CCTN.

Nakita sab nako ang daghan pang mga dinapit sama nilang Assistant Secretary Butch Junia, Collector Paul Alcazaren, Roger Vallena, Joseph Mariblanca ug Joseph Tubilan sa Superbalita.

Di na nako masulat ang tanan apan klaro na kaayo ang akong punto nga mga bug-at nga mga personality sa kagamhanan, business, ug media ang nanambong sa maong induction ceremony.

Matod pa ni Secretary Remonde, ang Rotary usa ka kalibotanong komunidad sa mga tawo nga nagtumong sa pagtabang sa mga kabos.

Malaumon ko nga human niining induction ni Ely, magsugod ang mga duol nga kooperasyon tali sa Rotary, media ug kagamhanan.