MISS Mandaue 2010 gipasanginlan nga nibugno sa iyang kaubang kandidata atol sa gipahigayon nga meeting de avance sa local candidates sa Liberal Party sa Ouano ave., North Reclamation Area, Mandaue City niadtong miaging gabii.
Wa pa masayri kon ang mao nga hitabo di ba makaapekto sa iyang korona kay segurado man kining makamugna og kontrobersiya. Wa sab mahibaw-i unsay ilang giawayan.
Si Sharon Grace Angel, 19, dalaga, taga-dalan Gullas, dakbayan sa Sugbo,nidangop sa Police Station II sa Mandaue City Police Office (MCPO) kay matod pa gibugno ni Karina Nikko Gajudo, 18, taga-barangay Talamban, dakbayan sa Sugbo.
Giingong napungot si Gajudo kang Angel nga maoy iyang gipasanginlang nipakatap sa tabi-tabi nga luto-daan ang maong pageant.
Nasayran nga si Gajudo maoy nakoronahan pagka-Ms. Mandaue 2010 samtang si Angel nagsilbi nga 3rd runner-up sa maong indigay sa gipahigayon nga pageant night sa Ms. Mandaue niadtong Mayo 6.
Ang talent manager ni Angel nga si Dexter Alazas nitug-an sa dihang nahinabi sa Sun.Star Superbalita nga nakurat na lang siya nga naghilak nga nagtawag kaniya si Angel nga nangayo og pakitabang.
Si Alazas niapas kang Angel aron pakigkitaan ang mga opisyal sa maong komitiba aron mahilot ang maong kasungian.
Ang duha ka mga kampo gipahinumduman ni First Lady Sarah Walker Cortes nga unbecoming sa usa ka kandidata ang paghimo sa maong eskandalo.
Giingong ang komitiba mopahigayon pa og tigom aron nga mahilot ang maong kasungian.
Ang insedente natala sa police blotter diin sa mga alas 2:00 kagahapon sa kaadlawon personal nga ni-report ang biktima uban kang Alazas ug nisaysay sa kinatibuk-ang hitabo ngadto sa kapulisan.
Sumala pa ni SP01 Dindo Montesclaros nga giduol ang biktima sa inahan ni Gajudo dungan sa pag-ingon “Ikaw Day ha, baga kag nawong. Imong gidamay ang akong pamilya. Naghimo-himo kag estorya ni Karina nga di deserving nga Ms. Mandaue.
Ikaw nagpakatap nga giluto ang Ms. Mandaue,” kutlo pa sa mga pulis sa giasoy kanila ni Angel.
Human sa inahan, giingong nibanos si Karina ug nagsinukliay sila sa mahait nga pulong ni Angel.
Matod niya nga gibukbok dayon ang buko-buko sa biktima ug nilabnot sa buhok niini.
Si Angel nagpakorasyon sa iyang nahiaguman nga kinawrasan ug bun-og.
Napakyas sa pagkuha ang Sun.Star Superbalita sa habig sa mga opisyal sa komitiba kay way motubag sa ilang mga contact number ingon man ang habig sa mga Gajudo.(FVQ)