Na-misinterpret lang ko sa estudyante: pari

Friday, July 30, 2010

NIATUBANG na kagahapon kang Arsobispo Ricardo Cardinal Vidal ang paring gipasanginlang nanghinol og paa sa mga high school student atol sa ilang recollection sa niaging semana.

Updates on President Benigno Aquino III's presidency

Have something to report? Tell us in text, photos or videos.

Duna na say gimugnang komitiba ang arsobispo nga maoy mohimo sa imbestigasyon apan wa gimando niini ang pagtangtang sa pari gikan sa iyang parokya.

Personal nga giesplikar sa pari, (ngalan gipungan samtang wa pay pormal nga kasong gipasaka) ngadto kang Vidal ang iyang habig taliwa sa mga nigawas nga pasangil sama sa paghikap og paa, paghawok, pagpitikpitik og bra sa mga tinun-an atol sa kompisal ug ang giingong pagpanghambog niini nga duna siyay mga uyab apil na GRO ug mga madre.

“Kanang tanan di gyud na tinuod,” nagkanayon ang pari, kinsa tuyong nibisita sa Sun.Star kagahapon aron ipadayag ang iyang habig sa kontrobersya.

Nagtuo ang pari nga “na-misinterpret” lang sa mga tinun-an ang iyang paghikap sa kamot ug pagtapik sa abaga nga alang kaniya pamaagi lang sa pag-console sa mga tinun-an nga nisugilon sa ilang mga kasaypanan.

Wa sad siya mosuway og hawok ug posibling ang gipasabot sa mga tinun-an mao ang pagpaduol sa iyang nawong sanglit halos maghunghong man siya sa pagsulti aron di madungog sa ubang tinun-an kay gamay ug abli ra ang nagsilbi nilang confession room.

Ang pari nipakompisal sa 46 ka mga tinun-ang babaye human sa ilang usa ka adlaw nga recollection niadtong Hulyo 20, nga second batch na sa recollection.

Usa ka adlaw human sa recollection, maoy nasayran sa pari nga dunay nireklamo batok kaniya maong siya niatubang pagkasunod adlaw ug nipasabot sa nireklamong mga ginikanan.

Ang tunghaan wa hinuon mopugong sa mga ginikanan kon mopasaka og kaso batok sa pari apan nisaad nga ihunong na ang pagkuha niini alang sa recollection.

Matod sa gipasanginlang pari nga wa masuko kaniya ang Cardinal apan gipasabot siya nga kinahanglan duna gyuy himuong imbestigasyon aron pagpagawas sa kamatuoran.

“Naikog lang gyud ko nga na-drag ang archdiocese ilabina ang Cardinal ani nga isyo nga sa una ako man gani tigtambag niadtong mga pari nga na-involve sad og mga isyo maong di gyud nako na buhaton,” pasabot pa sa pari.