Asoy ni Junrey Nadela

NAGSUGOD na sa ilang training ang 354 ka mga batan-on nga gustong magserbisyo sa Philippine National Police. Human sa ilang pagpanumpa niadtong Miyerkules, gihakot gilayon silang tanan ngadto sa headquarters sa Regional Mobile Group sa lungsod sa Sibonga alang sa duha ka mga semana nga pagbansaybansay. Ako silang naabtan sa maong dapit niadtong Huebes nga nagkadusingot samtang nag-formation.

Dihay gikutasan, diha sa’y gipasilongan kay daw nawad-an sa panimuot. Matod ni Supt. Rey Lyndon Lawas, director sa RMG-7, nga sud sa duha ka semana tudloan sila sa pipila ka basic nga leksyon mahitungod sa pamolis sa di pa sila ihatod didto sa Regional Training School nga nahimutang sa Barangay Gaas, sakop sa lungsod sa Balamban. Sa mga minahal sa kinabuhi sa maong mga trainee nga mibati na og kamingaw sa ilang mga pinalangga.

Pataas taasi pa ang inyong lahutay sa kamingaw kay taas pa kaayo sila og latason.

For updates from around the country, follow Sun.Star on Twitter

SUGYOT

Naa ko’y sugyot sa PNP ilabi na sa mga nagdumala sa training ning maong mga pulis. Di ikalimod nga malampuson kaayo ang mga module nga inyong gisagop sukad pa kaniadto. Gani, daghan kaayo sa inyong gibansaybansay ang malampuson na kaayo karon sa ilang career isip pulis. Nanga-opisyal naman gani ang uban.

Ang sakit lang sab nga palandungon duna sa’y daghan nga nagpa badlong ilabi na sa mga nag-ranggo og police officer One kun PO1. Ang record nagpakita nga ubay-ubay na kanilang PO1 ang nataktak gikan sa serbisyo gumikan sa nagkadaiyang mga kaso.

Dunay criminal, duna sa’y administratiba. Kon imong suhiron gyud og maayo, ang uban ning maong kaso naglambigit og kuwarta o panguwarta. Duna sa’y uban nga gumikan sa abuso ginamit ang ilang hinagiban. Pila ra hinuon ni sila ka pudyot itandi sa nagbinuotan. Kanang kuwarta hilabihan gyud nga inita. Mao nga akong sugyot, nga sa diha palang sa ilang training hatagan og gibug-aton ang pagtudlo kanila kon unsa ka importante kining pagdumala sa ilang budget. Financial management alang sa ilang kinitaan aron di sila mabulit sa utang.

Kay kon mabulit gud sa utang unya magkakompormiso, sayon ra kaayo silang mahaylo sa illegal nga panguarta mao nga makadungog na lang ka nga nakarga sila sa listahan sa mga tigdawatan og senimana gikan sa mga operator sa illegal nga negosyo. Kon mahimo, di una na sila tugutan nga maka-loan aron makompleto ang ilang dawaton nga sohulan. Gawas lang tingale kon pang-emergency gyud ang padulngan sa kuarta.

Kining pagpangutang wa may problema kon dunay mobalik nga ginansya. Apan kon mo-loan lang para sa way hinungdan, paita sab! Kanang uban nga naghunahuna nga mo-loan kay gustong mopalit og armas kay nindot kaayong itakin unya’g graduate, kalimti una na. Huwata nga ang gobyerno maoy mo-isyu ninyo sa armas nga inyong gikinahanglan. Laing butang nga gusto nakong isugyot, palapdan ang ilang kahibalo mahitungod sa public opinion. Unta sensitive sila pulso sa katilingban, nga sa bisan unsa nga bati nga aksyon nga ilang himoon, makadaut kini sa di lang sa ilang kaugalingon apil na ang organisasyon.

Unta kadtong gihimo sa mga SRU-SWAT sa CPPO sa wa pa sila mo-graduate himuon sab sa ilang batch. Suheto kaayo ini si Supt. Erson Digal, ang atong pangulo karon sa R-4, kay siya may akong gisugyutan ini kaniadto. Nakaapil pa man gani ko og lecture nila ma-hitungod sa papel sa reporter sa mga alarma nga ilang maapilan. Sila si Leo Lastimosa ug Bobby Nalzaro ako sab nga gisugyot nga mo-lecture mahitungod sa subject nga public opinion. Miingon ang uban graduates sa RTS nga nakaagi sab daw sila ini, apan nindot daw ang lecture nga naagian sa SRU-SWAT.

Kon sensitive gud ang usa ka pulis sa public opinion kuli kaayo siya nga magpabadlong kay sayod man siya nga mahimong wa gyu’y kapuslanan ang iyang pagpasingot panahon sa training kon mataktak lang siya sa usa ka pamilok tungod kay na-among ang iyang career tungod sa sayop nga binuhatan.