NIADTONG Miyerkoles sa gabii Nobyembre 4,usa ka dugoon nga hitabo ang wa palandungang motugaw sa malinawon kaayong kagabhi-on sa lungsod sa Barili. Ang alarma sa pagpanulis nga ginuntan pa gyud og pagpamusil diin ang biktima mao ang magtiayon nga Luisito ug Gina Ponsica. Si Luisito naa na sa luwas nga kahimtang apan ang iyang hamiling kapikas nga si Gina nakabsan gyud sa palad. Biktima sila sa tulis diha atubangan sa gate sa ilang balay.

Paglapas sa tungang gabii, sa ato pa petsa 5 na, laing alarma ang nadawat sa kapulisan sa Barili. Kini mao ang sunog sa Bartolome and Manuela Memorial National High School. Duha ka classroom ang naugdaw. Si Mam Josephine Arriesgado ang officer-in-charge nga akong nahinabi masulob-ong nagbatbat sa mga butang nga nalakip pagka ugdaw.

Kini mao ang mga libro, form 137, class record, mga lingkoranan ug personal nga gamit sa mga magtutudlo. Resulta puerting lo-uya sa subra sa usa ka gatos ka tinun-an sa 2nd og 3rd year nagkatibulaag atol sa akong pagduaw gahapoon sa buntag.

Sun.Star accepts donations for victims of Typhoon Ondoy

TABANG

Sa duha ka mga pang-hitabo makaingon ko nga mas sakit ang gidangatan sa pamilyang Ponsica. Dili tiaw ang pagsuway nga ilang nahiagoman. Sigun sa imbestigasyon wa gyu’y kaluoy ang mga tulisan nga mipusil sa magtiayon. Bisan kon mihangyo na ang kanhi bise mayor nga di lang sila pamusilon kay andam nilang ihatag ang kuarta nga maoy ilang tuyo.

Nagpalingug lingug ang mga tulisan ug nagpasuabe gyud ang ilang yawan-ong tuyo.

Kadtong giingon nga tungod sa pagdugay dugay ni Gina pagtunol sa bag nga maoy gisudlan sa kuarta, normal man lang ni nga reaksyon kay maanugnan man gyud ta.

Apan di sab ni rason nga pusilon na lang gyud sa tulisan nga unta mahimo man kaayo nila ang pagbunlot sa bag nga di na kinahanglang mamusil pa.

Makaingon ko nga di mga professional ang naghimo sa krimen. Dali ra kaayo silang natarantar.

Mao nga nanawagan karon si Chief Inspector Alexander Soledad, hepe sa kapulisan sa Barili, niadtong dunay nahibaw-an sa maong krimen nga palihug atong tabangan ang pamilyang Ponsica nga makaangkon og hustisya.

LOOY SAB

Samtang sa ikaduhang trahedya luoy baya sab ang mga tinun-an nga biktima sa sunog. Kadtong akong nasaksihan sa classroom ug sa stage diin sila gi-apod-apod, nakapangutana kon nganong sila pa man ang mag-antos.? Kanang magbarog ka hangtod mahuman ang klase, way lipod lipod nga gitug-an kini sa mga tinun-an nako nga kapoy kaayo ang maong kahimtang. Sakit ang bagtak ug binhod kaayo ang ilang mga lapalapa. Hinuon ang akong suod nga higala nga Chris Flores, election ffficer sa Barili, niingon nga sa matag ingon ini nga trahedya mapaabot gihapon ang bag-ong tingusbawan nga sarang makahupay sa nagdugo nga kasingkasing.

Samtang si konsehal Joseph Elvir Tubilan sa barangay Poblacion misaad nga di sab niya katulgan ang paghangyo kang Gov. Gwen Garcia ug Congressman Pablo John Garcia nga pabarugon pagbalik ang naugdaw nga eskwelahan.