Nadela: Way gipili ang sunog

Friday, March 12, 2010

NAANAD na ko nga mo-cover og alarma sa sunog. Di na ko mahinumdom kon kapila na ko makasaksi og ingon niini nga katalagman. Diha pa man gani higayon nga kalit lang ko nawagtang sa kahanginan samtang nag-report ko og alarma sa sunog kay nahimo kong emosyonal sa akong nasaksihan mao nga wa na ko makatingog. Kinsa ba’y di matandog nga magtan-aw sa usa ka tawo nga magsyagit taliwala sa nagdilaab nga kayo. Ang di sab nako makalimtan kadtong dakong sunog sa Barangay Tinago. Nahibulong ko nganong ang akong kauban nga reporter kaniadto sa nang-radyo pa ko, suheto kaayo sa lugar ug kaila niya ang mga tag-iya sa panimalay nga gikaon sa kayo.

"The Manny Pacquiao Blog". Click here for stories and updates on the Filipino boxing champ.

Have something to report? Tell us in text, photos or videos.

Nindot kaayo paminawon ang iyang report kay ang matag biktima sa sunog nga iyang masugatan, kompletong pangalan ang iyang i-report sa kahanginan. Hangtod nga nag-report siya og panimalay nga gisugdan na og kaon sa kayo. Nahibulong ko kay suheto kaayo siya hasta ang sulod sa panimalay nga gikaon sa kayo sama sa brand sa TV, gas stove, sala set, nahimutangan sa kwarta, alahas, pila ka kwarto ug ang mga nagpuyo. Diay ang balay nga naugdaw, iyaha ug wa na siya’y nahimo pa gawas sa pagpaambit na lang sa mga listeners sa iyang nakita.

NAG-ABOT

Sa kadaghan sa alarma sa sunog nga akong na-cover kon mahimo pa lang nga mamili ta og assignment adto na lang ko sa sunog nga molamoy og gatusan ka panimalay basta wa la’y kinabuhi nga makalas. Duha na gyud ka higayon karong tuiga nga naka-cover ko og sunog nga dunay mga kinabuhi nga nakalas. Ang una mao kadtong sunog nga mikalas og upat ka tawo sa Barangay Capitol Site.

Nahitabo ni sa niaging bulan. Nasundan na sab ni og laing sunog diin tulo ka kinabuhi ang napaig.

Ambot kon gituyo ba sa panahon kay sa duha ka sunog ang imbestigador sa kabomberohan nga na-assign usa ra. Siya mao si FO3 Antonio Gonzales. Unya ang team sa homicide police nga nadistino mao ra gihapon ang mga nawong. Mao ni among gi-estoryahan niadtong Huwebes sa kaadlawon human nga kining akong gipanghisgutan subli nakong nahimamat didto sa Calderon Compound sa Banawa. Klaro kaayo sa pahiyom sa mga hingtungdan, nga kining tanan tungod ra gyud sa matang sa trabaho nga among gisudlan.

LAGTANG

Ambot og nadayon ba gyud ang tag 325 pesos nga amutan sa mga tinun-an diha sa Lagtang National High School alang sa graduation ceremony karong bulana. Naglibog ko nganong miabot og 325 pesos ang ilang amutan taliwala sa panawagan sa DepEd nga magdaginot ug di magpataka og gasto alang sa graduation ceremony. Ang ilang PTCA migahin og 3 mil pesos kapin para sa snacks sa mga bisita. Naglibog gihapon ko nganong wa nila i-apil sa listahan ang mga migradwar. Pa-esnakon sab unta ninyo nang mga bata nga mopaso. Di baya lalim kining mo-graduate ta.