Nalzaro: Ang kapitan kaniadto ug karon

Wednesday, September 8, 2010

NIADTONG mga dekada 50 o 60 ang papel sa mga tenyente del barrio o mga kapitan sa barangay magsilbi ra gyod sila nga peacemaker. Kana bang tighusay sa away sa ilang lugar labi pa sa mga silingan ug magti-ayon. Kasagaran nga pili-on sa pagka kapitan niadto kadtong mga tawo nga inila o respetado sa ilang balangay. Labi pa gyod tong mga yutaan bisan kon walay grado. O kadtong dunay grado. Kay niadtong mga panahona, ang graduwado sa high school puwede naman makatudlo.

Unya panahon sa eleksiyon, wala pay pinalitay pinaagi sa kuwarta. Apan ang mga kandidato pagkakapitan mag-ihaw og kabaw aron pakan-on ang mga botante sa dili pa moadto sa presento. Magkumbira ang mga mokandidato. Mao nga ang mga busog kanunay.

Have something to report? Tell us in text, photos or videos.

Updates on President Benigno Aquino III's presidency

Kay tiaw ba nimo kanang kabaw goy ihawon. Palit gihapon but in another form. Inig daog, lain na pod nga kumbira. Unsay mando sa kapitan, bisan kon walay pinirmahan, mosunod man gyod ang mga tawo labi pa didto sa probinsiya. Momando ang kapitan nga magpintakasi o magbayanihan, musunod ang ma tawo uy.

MANOK

Didto sa among baryo sa Olingan, Dipolog City, akong uyuan ang kapitan dugay na nga panahon. Dunay mag-away nga silingan, momando gyod dayon tong among kapitan nga padad-on og manok ang mga protagonista. Unya ang ilang manok nga dad-on i-hawon adto sa balay sa kapitan ug magsawo sila ug manga-on sa nag- away. Hangtod nga magka-uliay ang ilang maayong kabubut-on.

Mao gyod to ang himoon sa akong uyu-an sa matag higayon nga adunay mag-away ug moadto niya aron husayon. Hangtod nga mi-abot gyod ang panahon nga wala nay nag-away sa iyang mga konstituwente. Mao nga iyang gipasusi. Sus, nahibaw-an niya nga nahurot na diay ang mga manok sa iyang baryo. Mao diay tong wala nay nag-away kay wala na may dad-ong manok ngadto sa kapitan. Pagkatoytoy!

LAHI NA RON

Pero ang mga kapitan karon lahi na. Kay dako na kaayo ug gahom ubos sa Local Government Code. Tiaw ba nimo kanang mao nay mo-implementar og mga proyekto. Mopirma na og mga kontrata ug maoy mo-aprobar sa mga application sama nianang mga communication towers o antenna, magtukod ug mga subdivisions o condominiums ug mga memorial cemetery. Ang uban maghuwat pa og padangog una pa mo-approve.

Karon diay isyo sa pipila ka mga kapitan sa south disrict sa Cebu City nga posibling adunay mani-obra sa mga proyekto kay gi-corner ug usa lamang ka construction company ang halos tanang mga proyekto sa barangay. Hawshaw ang bidding. Nagtuo kaha kamo nga wala kini “cashsabutan” tali sa maong mga kapitan ug sa kontraktor. Mao nang ubang kapitan bisan walay tarong panginabuhi, kusog kaayong mopusta sa sabong og derby. Maayo ning imbestigahon sa Ombudsman.

(bgnalzaro@gmanetwork.com)