Nalzaro: Banda ni Mike

Wednesday, July 28, 2010

USA sa mga hilig ni Mayor Mike Rama mao ang pagkanta. Maayo mokanta na si Mike, dili na siya yabag. Maayo pod na siya motugtug sa conga. Kanang gamay og taas nga bass drum nga hapakon lang sa kamot. Sa laktod nga pagkasulti, music oriented na si Mike.

Mao nga dili na kita matingala kon nganong nagplano siya nga motukod og banda ang City Hall. Ang maong banda langkuban sa mga empleyado sa City Hall nga adunay igong talento.

Have something to report? Tell us in text, photos or videos.

Updates on President Benigno Aquino III's presidency

Kini gitumong aron kuno maka-relax ang mga empleyado. Kay relax ang mga empleyado, mamahimong productive o kugihan sa ilang mga trabaho.

Mokabat sa 2 milyones pesos ang gigahin alang sa pagpalit og mga instrumento. Ang maong gahin tipik ug kabahin sa mokabat nga 200 milyones ka pesos nga supplemental budget. Apan gikuwestiyon kini og maayo ni Councilor Margot Osmeña.

Gani gilaslasan naman kini og katunga. Importante ba gyod kining banda?  

UNSANG KLASENG RELAX?

Tinuod na ang gi-ingon ni Mike nga gikinahanglan nga morelax ta usahay. Kay kon sige lang ta og trabaho, puol kaayo. Importante kana kay makapa wala sa stress. Pero unsa man klaseng pag-relax ang gikinahanglan sa mga empleyado sa City Hall? Kanang sama sa relaxation ni Mike nga mokanta-kanta sa mga bar o karaokehan?

Kon kanang banda gamiton lang sa panahon nga adunay affair o kalingawan diha sa City Hall morag mahal ra kana. Nganong dili man lang mag-abang og banda kay mas makabarato ra ang City Hall. Unya kanang mga empleyado nga maglangkob aning banda, dili kaha na sila mangayo og overtime pay panahon nga magpraktis sila? Taas baya nga oras ang gikinahanglan anang praktis aron dili ta mayabag. Kini pagsunod lang gyod sa hilig ni Mayor Mike nga kanta-kanta.

KASAL GIPAKANSELAR

Adunay taga Dapitan City nga ania na manimuyo dinhi sa dakbayan. Gikatakda kini silang magpakasal ni Mayor Mike Rama kagahapon sa alas 4 sa hapon. Apan gipahibalo lang ang kaslunon kagahapon sa buntag nga ipakanselar ni Mike ang seremonyas kay naglain ang iyang lawas. Sus, naandam na ra ba ang tanan.

Na-ihaw na ang baboy ug napreparar na ang mga pagkaon. Ang mga bisita gikan sa Dapitan niana dinhi.

Sa pagsuwat nako ning maong lindog mga alas dose, wala pa hinoon mahibaw-i kon gipadayon ba ni Mike ang seremonyas.

Unsa ba dili na gayod siya makabakod? Magpa-agak siyang Joy Pesquera aron makabarog. Akong gisugyot nga ang kaslunon na lang maoy pa-adtoon sa panimalay ni Mike aron lang sila makasal. Siyaro naman og wala huna-hunaa ni Mike ang preparasyon. Mangapan-os ug mahamo ang gipreparar.

Unya gasto baya na. Ambot og nahinayon ba gyod?

(bobby@sunstar.com.ph)