Nalzaro: Donasyon

Monday, March 15, 2010

DAGHAN ang nisaway sa Halandong Arsobispo sa Sugbo Ricardo Cardinal Vidal human niini gibutyag nga nidawat siyag kuwarta gikan sa mga pulitiko nga nibisita kaniya og nangayo sa iyang bendisyon. Wala hinuon gibutyag sa Halandong Kardinal ang pangalan sa mga pulitiko. Matod niya nga iya dayon nga gi-turn over ngadto sa Caritas ang maong kantidad. Ang Caritas usa kini sa charitable institution nga gidumala sa Simbahang Katoliko.

Daghan kaayong mga kabus ang moduol sa Caritas aron mangayo og panabang sama sa pagkaon ug medisina.

Have something to report? Tell us in text, photos or videos.

Para nako morag wala man siguroy kuwestiyon kon modawat og kuwarta ang kardinal gikan sa mga pulitiko. Wala man kini mapunta sa iyang kaugalingong bulsa. Dili man usab nato ma-akusahan ang kardinal nga nagpapalit sa mga pulitiko kay wala man siya mo-endorso og kandidato. Dili sama sa ubang mga lider sa ubang relihiyon nga modemanda og posisyon sa kandidato nga ilang gisuportahan kon modaog man.

"The Manny Pacquiao Blog". Click here for stories and updates on the Filipino boxing champ.

HINABANG

Ang kuwarta nga gidawat sa kardinal mahulog ra gyud kana nga donasyon o hinabang ngadto sa panginahanglan sa simbahan. Dili kana sabton nga gipalit ang taga simbahan labi pa si Kardinal Vidal. Unsa may kalainan sa maong kuwarta nga gidawat usab sa simbahan panahon sa misa isip koleksiyon nga gikan sa manimbahay nga ang uban diha grabe og sala. Kanang Caritas nagkinahanglan kana og igong pundo aron makatabang sa mga kabus. Ang maong kantidad daghan nang gigutom nga tiyan ang mapakaon ug daghan nang masakiton ang makapalit og medisina. Asa man gud mokuha og kuwarta ang taga simbahan alang sa ilang panginahanglan, di ba gikan ra man sa donasyon?

WAY AYO

Daghan ang wala gyud malingaw sa away nila ni Manny Pacquiao ug Joshua Clottey niadtong Domingo. Naunsa man si Clottey nga sobra ra ang depensa sa iyang kaugalingon. Perming tabunan ang nawong. Ang iyang gloves maoy nabun-og sa nagpungasi nga kinumo ni Pacman. Naglisod og sulod ang mga kinumo ni Pacquiao kay todo depensa si Clottey.

Gibarugan gyud ni Clottey nga dili siya matumba ni Pacquiao.

Wala gyud tuod kay wala man siya mopakita og maayong labok. Kon mao to iyang style maayo pay mag-dancer na lang si Clottey kay sa magboxer siya. Matod pa sa taga Bohol, pagka way ajo. (bobby@sunstar.com.ph)