Nalzaro: Ecleo ug Tomas masakiton?

Thursday, March 18, 2010

GIBUTYAG sa pribadong doktor ni Philippine Benevolent Missionaries Association (PBMA) Supreme Master Ruben Ecleo Jr., nga namiligro ang kinabuhi ni Ecleo gumikan sa gihambin niining sakit sa kasingkasing. Gani, nirekomendar man ni Dr. Antonio Anastacio, cardiologist sa Makati Medical Center, alang sa dinaliang operasyon sa kasing-kasing ni Ecleo aron masalbar siya sa tinong kamatayon.

Mag-walo na tuig na kining maong kasong parricide batok ni Ecleo gumikan sa kamatayon sa iyang asawa nga si Alona Bacolod. Pila na ba usab ka tuig nga nagpabiling gawasnon si Ecleo human tuguti nga makapiyansa gumikan sa rason sa iyang panglawas?

Have something to report? Tell us in text, photos or videos.

Usa ka milyon ka pesos ang piyansa nga gitigi sa korte. Kon masakiton o ‘walking time bomb’ kini si Ecleo, nganong hangtod karon wala pa man lagi kini siya maoperahi? Gani nidagan pa man pagkakongresista didto sa ilang probensiya sa Dinagat Island.

Click here for Election 2010 updates

DATU UG POBRE

Mao ni nakalahi sa dato ug pobre nga mag-atubang og kaso. Kon adunahan ang akusado puwede ra niyang iliko-liko ang balaod.

Puwede man gani nga paliton ang hustisya. Kanang parricide lisod gyod unta na tugutang makapiyansa ang akusado. Pero sa kaso ni Ecleo dali ra kaayo. Usa ka milyon god. Unya dugay kaayo nituyok ang ligid sa hustisya. Tiaw nimo na pila na ka mga huwes ang ni-inhibit ning maong kaso.

Samtang adunay daghan dihang piniriso nga mas masakiton pa ni Ecleo apan gumikan lagi kay kabos man wala may ikabutang nga piyansa, aw, naa ra intawon nagtingkagol sa mabugnaw nga bilangguan. Dili gani dad-on o tugutan nga makagawas sa bilanggoan bisan og himatyon na. Asa man diha ang kaangayan?

Mao nang maka-ingon gyod ta usahay nga buta ang hustisya.

Nakakita mo anang simbolo sa hustisya nga usa ka babaye nga nagdala og timbangan nga tinaptapan ang mga mata? Mao gyod na. Buta ang hustisya.

MASAKITON

Dia poy laing isyo sa masakiton. Ang kampo ni Atan Guardo, kinsa midagan pagkakongresista sa Cebu City south district, miakusar nga migrabe na ang kahimtang sa panglawas sa iyang kaatbang nga si Mayor Tomas Osmeña. Matod pa sa kampo ni Guardo nga gani sa matag pulong-pulong ni Tomas magdala naman gani kini siya og nurse aron maka-atiman kaniya.

Tinuod ba kaha ni? Apan kon si Tomas usab ang pasultihon, maayo naman kuno siya. Kompleto nang na-alim ang cancer sa iyang pantog. Nag-ampo lang kuno si Guardo nga siya mamatay aron siyay makongresista. Mao lagi bisan kon gidukol na sa Ginuo, arogante lang gihapon ning mayora.

(bobby@sunstar.com.ph / / bgnalzaro@gmanetwork.com)