Bobby Nalzaro
Saksi

HUMAN masulbad ang problema tali sa Smartmatic ug sa local partner niini, ang Totai Information Management (TIM) kinsa maoy nakadaog sa bidding alang sa compute-rization sa 2010 elections, mahinayon na gayod ang automation sa atong piniliay. Apan dili pa gayud kini sigurado nga matuman gumikan kay adunay mga lakang karon ang pipila ka mga pulitiko nga ipahunong kini kay matod pa unconstitutional.

For updates from around the country, follow Sun.Star on Twitter

Siguradong modangop sa Korte Suprema ang maong mga pulitiko og posible nga mao unya kini ang makalangay sa maong programa. Posible man gani nga mapurnada kini og mobalik na usab kita sa mano-mano. Maayo lang unta kon wala nay sagabal aron makasagop na kita sa computerized election. Kay kita rang nasud nga wa pa gihapon pa makasagop ning maong sestema diin paspas kaayo ang resulta sa piniliay alang sa mga presidente, bise presidente ug mga senador.

DI SULBAD

Dali tuod ang pag-ihap sa mga botos alang sa mga national candidates, apan kining automation di kini makapawala sa karaang paagi sa piniliay. Di mawagtang ang pagpamalit og mga boto. Magpabilin gihapon ang pagsuburno sa mga botante pinaagi sa kuwarta og pagkaon. Naa gihapon ang pagpanghulga sa mga botante labi pa niadtong mga kritikal nga mga lugar.

Naa gihapon ang 3 G’s. Gold, guns and goons. Ambot kon kapugngan ba ang pagpanikas. Sa mano-mano dali kaayo ang pagpanikas. Gikan sa presento ngadto sa city, municipal og provincial canvassing. Taas ug dako kaayo ang kahigayonan nga mahitabo ang tikas kay dugay kaayo ang eskotenyo. Naa pay ballot switching. Kon full automation na ang eleksiyon, duna man gani maniobra pero dili na kaayo lapad ug dako ang tikas kon itandi sa mano-mano.

ABSUWELTO

Gi-dismis sa piskaliya ang kasong parricide nga gipasaka batok kang Pastor Leonardo Jastiva sa Seventh Day Adventist gumikan sa kakuwang sa mga ebedensiya. Bugtong ang mga text messages lang gikan sa cellphone ni Jastiva nga gikan usab sa mga nagdagit sa iyang asawa nga si Judith. Mao-mao ra daw kadto ni Jastiva. Wala sab matod pa mopakita og kooperasyon sa kapulisan ang pastor mao siya ang gitumbok nga nagpapatay sa iyang asawa.

Palpak ang kapulisan. Morag ila man god nga gidispuga ang imbestigasyon. Hilaw kaayo. Wa gyud tinua sa kapulisan kon lig-on ba ang ilang mga ebedensya batok sa Pastor. Daghan na gayod nga palpak kining atong mga pulis. Mao kanunay lagi akong nagpahimangno kanila nga lahi kanang imbestigasyon og prosekusyon. Labi na kon adto na gyud sa korte kay ang akusado konbiktuhon ‘beyond reasonable doubt’ kon way lama sa pagduda. Kay kon dunay pagduda pabor kana sa akusado.

(bgnalzaro@gmanetwork.com)