Nalzaro: Good luck, Manny
Saturday, March 13, 2010
More Sections
POSIBLING mohunong na usab ang kalibutan karong adlawa gumikan sa gikahinamang away nila ni World champion Manny Pacquiao ug Joshua Clottey sa South Africa didto sa Cowboys Stadium sa Dallas, Texas. Medyo dihado si Clottey gumikan kay inilog man si Pacquiao. Halos tinunga ang pustahanay. Si Pacman adunay pito ka mga titulo sa nagkalain-laing division. Samtang si Clottey, 32 anyos, adunay 39 ka mga knockout. Ngilngil sab og record kini si Clottey.
"The Manny Pacquiao Blog". Click here for stories and updates on the Filipino boxing champ.
Have something to report? Tell us in text, photos or videos.
Adunay mga pangagpas nga posibling pildihon si Pacquiao ni Clottey gumikan kay medyo dako kini og lawas ang African boxer kay sa Pinoy boxing idol, kinsa maoy gi-ila nga pound for pound king. Naa man ganiy komedya nga basin dili kaayo makakita sa kinumo ni Clottey si Pacman kay itum gyod ni kaayo. Morag agta. Basin malipat unya si Pacman. Aw, matod pa sa iningles ni Pacquiao; ‘let’s see the scattered after the fight’. Sa Binisaya pa, ‘makita rang katag human sa away’. Good luck, Manny.
NABARAW
Wala mahinayon ang gikatakda nga plebisito kagahapong adlawa alang sa pagbuak sa Barangay Guadalupe human mikapanaog og temporary restraining order si RTC Judge Gabriel Ingles. Ang desisyon sa huwes sa pagpahunong sa plebisito nunot usab sa gisang-at nga petisyon ni Labangon Barangay Councilor Victor Buendia. Nabalaka si Buendia nga mawad-an siya sa residency sa Labangon kon mabalik ang Rosalina Village diin siya magpuyo,ngadto sa Guadalupe.
Wala ako mokuwestiyon sa giluwatang TRO ni Judge Ingles kay iya man kanang desisyon. Pero ang ako lamang i-kapangutana kang Buendia nga nganong karon pa man kini niya giisa ang maong isyo? Kining pagbuak sa Guadalupe ug pagtukod sa barangay Banawa-Englis dugay na kining isyoha. Dugay nang gikatakda ang plebisito apan nganong niadto pa mang mi-aging adlaw gisang-at sa korte ang petisyon? Wala kahay nagpaluyo niini nga mga politikanhong kamot aron malawgaw ang isyo? Buot ipasabot nga walay plebisito nga mapahigayon kon dili maresulbar ang boundery issue. Abtan tag siyam-siyam ani. Wala man na lihuka sa Konsiho sa dakbayan sa Sugbo.
VOTE GOD
Gilusad sa Simbahang Katoliko ug sa Dilaab Movement ang Vote God campaign. Wala hinuon, moendorso og mga kandidato ang maong bag-ong kahugpungan nga angayan botohan. Apan ila lamang gi-awhag ang mga botante nga botohan kadtong mga kandidato nga mahadlukon sa Ginuo. Gi-awhag sa maong grupo nga himbisan gayod ang mga kandidato nga adunay maayong track record.
Aw, kadtong mga kandidato nga wala magsubay sa lagda sa simbahan, labi pa niining misuporta sa Reproductive Health Bill nga kusganong gisupak sa Simbahang Katoliko. Mibali god ning ubang kandidato kay nahadlok sa bahad sa simbahan. Pero ang pangutana kon aduna ba gayoy Catholic votes? Pero maayo ning gihimo sa taga simbahan kay aktibo kaayo sila nga moedukar sa katawhan.
