IYANG gipaputlan og kuryente ug linya sa telepuno ang iyang police station. Apan gipabalik ra usab kini niya human sa duha ka adlaw. Karon, unsa na pod kahay laing lakang ni Consolacion Mayor Avelino Gungob Sr., aron siya makabawos sa mga opisyal sa kapulisan nga nagpa-recall sa iyang duha ka mga police escorts?

Matod pa ni Gungob nga warning lang kadtong iyang gihimo ug duna pa siyay lain nga himuon.

Nilugak siya kay hadlok siya sa DILG o ba kaha ni Gov. Gwen Garcia kinsa mibahad nga ikiha siya kon iyang ipadayon ang iyang lakang? O ba kaha gumikan sa mga kumentaryo sa media? Ngano god tawon nga iya mang lisod-lisuron ang iyang mga pulis diha?

Sa iyang gihimong lakang, di ang mga opisyal sa kapulisan ang iyang gisilotan, kon di ang iyang mga konstituwente nga maoy nagbutang niya diha sa puwesto.

Sun.Star accepts donations for victims of Typhoon Ondoy

MORAG SIYAY TAG-IYA

Kon lig-on pa unta ang iyang baruganan, nganong nilugak man siya? Iya unta kadtong ipadayon ang pagputol sa kuryente sa tibuok estasyon. Di unta niya hatagan og gasoline allocation ang kapulisan. Iya untang ipadayon ang iyang bahad nga papahawaon niya ang tibuok puwersa sa kapulisan ug hulipan og barangay tanod. Sus, si Gungob morag maoy nakapanag-iya sa munisipyo sa iyang lungsod.

Unsa man diay siyay nagbayad sa electric ug telephone bill sa kapulisan? Iyang kaugalingon nga kuwarta ang gipalit og gasolina sa mga pulis. Ug siya bay tag-iya anang munisipyo? Kining maong mga lakang buhaton lang kini sa usa ka tawo nga kuwestyonable ang pangisip. Pero paminaw nako, tarong pa man og panghuna-huna kining mayora. Gahi lang kini siya og ulo kay wa gipaminaw ang balaod. Bisan kapila na isyuhi og cease and desist order sa DENR aron ipahunong kanang iyang illegal quarry operation, wa gyud maminaw,

UNSAY NAKA-ESPESYAL

Apan unsa bay naka-espesyal niadtong duha ka mga police escorts ni Gungob nga sila si PO1 Sherwin Leyson ug PO1 Jorahmine Espinosa nga midemanda man gayud siyang ipabalik kadto sila.

Akong nahibaw-an nga gawas nga tigbitbit kadto sa iyang mga gi-shopping maoy usab kadto sila ang gigamit ni Gungob sa pagpanghulga sa mga tawo nga misupak sa iyang gihimong illegal quarry operation diha sa Barangay Garing.

Maoy hinungdan nga gipangkiha kadto sila. Gawas pa, gikuha lang to ni Gungob diha sa iyang police station ug wa gayuy klaro ug pormal nga assignment gikan sa police security division nga i-detail sila kang Gungob. Gani karon gipang-recall naman ang mga pulis nga gihimo escorts o bodyguards sa mga pulitiko. Unsa ba to sila mga batan-ong pulis? Duda man sab ta aning Gungob kay makigkamatay man gyud siya aron mabalik kaniya ang duha ka mga escorts. Kuyaw ni si Gungob og mosinggit na kini siya og ‘Darna’. Pagkatoytoy! (bgnalzaro@gmanetwork.com)