Nalzaro: Hinanggaw

Thursday, July 29, 2010

HUMAN sa plano ni Mayor Mike Rama nga magtukod og banda sa City Hall, laing hinanggaw nga sugyot ang gipalutaw ni Vice Mayor Joy Augustus Young nga mao ang pagpalit og eroplano aron gamiton sa rescue operations panahon nga adunay kalamidad sa kabukiran.

Naka-ingon kong hinanggaw kay impractical kaayo. Kanang eroplano nagkinahanglan na og airport o airstrip para makalanding. Dili sama sa helicopter nga helipad lang ang gikinahanglan o bisan gamay’ng hawan nga lugar puwede nang makalanding.

Have something to report? Tell us in text, photos or videos.

Updates on President Benigno Aquino III's presidency

Kon gamiton kana alang sa rescue operation didto sa kabukiran, asa man intawon kana palandingon ni Joy Young didto sa bukid? Sakyan lang kuno alang sa aerial inspection kon adunay kalamidad. Sus, dili na kinahanglan nga mopalit ta uy kon mao man lang gani ang tumong ana. Puwede ra silang makapanghuwam og helicopter o chopper sa Air Force o ba kaha sa Central Command.

Unya ang maintenance ana? Unya mo-hire pa ta og piloto kay gikinahanglan baya na nga licensed pilot ang modumala ana.

PANAHON PANG MAMPOR

Sus, ang paliton ni Joy Young mao ang tulo ka four-seater plane nga iya sa Department of Education (DepEd) nga gi-bidding na karon. Ang duha ka eroplano himulbulan og piyesa aron i-ayo sa usa. Santisima, unsa may pagtuo ni Joy Young nga refrigerator nang iyang paliton nga puwede lang i-ilis-ilis o baylohon ang piyesa? Aw, okey ra na kon mo-andar na siya maoy unang mosakay.

Panahon pa man nang Mampor nang eroplanoha. Tiaw nimo nang 40 anyos na.

Kon gusto man sila nga makabaton og sakyanan sa kahanginan, mas maayo pa nga mopalit og bag-ong helicopter o chopper. Kay kanang chopper puwede nang makatugpa sa kabukiran ug magamit gayod sa rescue operations sama sa nahitabo sa pagkahagbong sa tourist bus nga gisakyanan sa mga Iranian nationals didto sa barangay Cansumoroy sa Balamban.

Pero didto pa man gani naka landing sa Balamban proper. Gawas pa ang helicopter magamit pod kini sa kapulisan paggukod sa mga kriminal nga nagsakay og mga sakyanan sama didto sa Estados Unidos. Pero eroplano unya guba-on pa? Ayaw na lang ta.

MAGTUKOD

Unsa may gi-apas ni Joy Young? Commission sa pagpalit anang maong mga karaan ug gubaon nga mga eroplano sa DepEd? Nganong dili man lang gamiton nang maong milyones nga kantidad pagpalambo sa edukasyon pinaagi sa pagtukod og mga school buildings?

O pagpamalit ba kaha og mga kagamitan alang sa mga tunghaan.

Para nako hinanggaw ning maong plano ni Young.

(bobby@sunstar.com.ph)