KINING suwerte sa tawo di gayud nato matagna. Kinsa bay magdahom nga usa ka basurero makakaplag ug dolyares nga mokantidad ug tulo ka milyon ka pesos sa basurahan. Mao toy klaro nga kuwarta sa basura. Ang maong basurero, Napoleon Ursabia, sa dugay na niyang panginabuhi nga pagpanguykoy ug basura, nasuwertihan ra gayud. Morag nakaigo og lotto. Ang kadanghag sa uban, suwerte sab sa uban.

Si Emiliano Tanpin Jr., usa ka money changer, misulod sa maong kantidad sa sako gikan sa iyang buhatan. Apan iya kining gibilin kay milakaw siya. Unya nasundan sa iyang helper nga babaye. Nagtuo ang babaye nga basura kadto busa iya kining gibutangan og mga basura. Pagka-ugma, milabay ang garbage truck. Iyang gipa-pick up ang maong sako. Aw, nadala gyud ngadto sa Inayawan Sanitary Landfill. Dihay batan-on nga nakakita sa sako. Iyang giabrihan. Sus, pag-abri karon diha may dolyar.

PAGKAMATINUD-ANON

Nagduda ang batan-on nga genuine ba ang maong dolyar. Iyang gisugo ang usa ka magtiayon nga pa-ilisan ang maong dolyar. Milampos ang magtiayon. Aw, nanghatag pa siya og bahin sa iyang mga kaubang basurero. Mibangka pa og inom ug nanghatag og bugas. Karon wa na magpakita ang maong batan-on kay gipangita sa mga tinugyanan sa National Bureau of Investigation (NBI) gumikan sa hangyo sa tag-iya. Pangutana. Madakop ba o mapriso ba ang maong batan-on. Matod pa sa pipila ka mga abogado nga di madakop ang maong batan-on gumikan kay wa man niya kini kawata.

Iya kining nakit-an sa basurahan nga ang mga materyal diha mga discarded na. Di kini sama sa usa ka butang nga makit-an diha sa dalan. Sa pagkamatinud-anon sa maong batan-on? Pero nauli na ang tipik ug kabahin sa maong kantidad kay giuli sa igsuon sa nakakita. Si Julie Compisto, igsuon ni Napoleon, nga nabinlan sa nahibiling kantidad nakonsensya busa iyang giuli ang nahibilin. Bisan pa sa kapubrehon ni Compisto, wa gayud kini matintal sa maong kantidad. Pero si Napoleon wa pa gayud pakita. Posibleng duna pa toy siyay nabilin nga kuwarta. Sige lang Dong Polyon, hulog nang langit man na.

BONIFACIO

Ambot og pipila na lang kaha sa atong mga bag-ong henerasyon karon ang nakaila ni Andres Bonifacio, usa sa atong mga nasudnong bayani kinsa miula sa iyang dugo ug mihalad sa iyang kinabuhi aron mapanalipdan ang nasod gikan sa mga pagdaog-daog sa mga Espanyol nga midumala sa atong nasod. Andres Bonifacio Day karon ug manghinaot na lang kita nga aduna pay nahinumdom sa pagkamabayanihon ni Ka Andres. Ang ato lang mahinumdoman nga holiday karong adlawa. Apan gumikan kay Dominggo man karon mao nga giuswag kini ugma.

(bgnalzaro@gmanetwork.com)