'AYAW pagsulti og patapos'. Mao gyud ni ang magsilbing leksyon sa uban. Tan-awa og unsay nahitabo ni First Lady Margot Osmeña. Sa nanglabay'ng mga interview, si Ginang Osmeña hugtanon gyud nga nibalidad sa mga tanyag nga siya maoy mohulip sa iyang bana nga si Tomas. Gani ang mga sumosunod sa Bando Osmena Pundok Kauswagan (BOPK) nituboy man niya. Si Ping Lacson, sa wa pa siya masenador, niadtong wa pa mapalagpot si kanhi Presidente Joseph Estrada diin siya maoy PNP chief, niingon usab nga di siya mag-apil-apil sa pulitika kay gubot. Apan nidagan diay pagkasenador. Sa wa pa mopakita og interes si Tomas nga magpapili sa pagka kongresista sa south district, una mang nitumaw ang ngalan ni Margot. Apan ang tanang tanyag gibalibaran ni Margot kay lagi di siya ganahan sa pulitika. Okey na lang niya nisuporta siya sa iyang bana pinaagi sa mga programa niini sama sa pag-atiman sa mga batang libud-suroy. Puno kuno sa intriga ang pulitika.

APIL MAN LAGI

Apan unsa bang pagka-unsaa nga nausab man lagi ang hunahuna sa unang ginang? Karon apil naman siya sa line up sa pagkakonsehal sa BOPK sa south district uban ni kanhi Konsehal Ronald Cuenco. Unsa may nakapausab sa hunahuna ni Margot? Insakto pa ang giingon sa pipila ka mga tigpaniid sa pulitika nga gibutang lang siya sa line up aron di makasulod si kanhi Konsehal Joy Pesquera, ang giingon nga hinigugma ni bise mayor Mike Rama?

Sun.Star accepts donations for victims of Typhoon Ondoy

Kay lisod kuno og naa si Joy kay siya maoy manghawod kon mapili man pagka-mayor si Mike. Lain akusasyon nga si Margot maoy mo-neutralize uban ni Joy Young, kandidato pagka-bise mayor, diha sa Konseho kon moabot ang panahon nga modako ang ulo ni Mike ug di na pakontrolar ni Tomas. Kon mao nang kalakiha, di gyud makaugpo si Mike niini. Insakto ang giingon ni kanhi Senador Sonny Osmeña nga yaya ni Mike si Margot ug unya si Mike morag tawo-tawo ra gyud sa humayan inig ka
mayor niya. Molihok ra og palihukon sa iyang amo nga si Tomas, abog sa maya. Paet!

NAG-AWAY

Unya mangutana mo nganong naapil man usab si Ronald Cuenco sa line up nga nag-away man kaha sila si Tomas ug Tony Cuenco? Aw, kana estratehiya ra gihapon ni Tomas. Aron makuha sa BOPK ang mga supporters ni Tony ug di moadto kang Atan Guardo nga maoy ikaatbang ni Tomas sa pagkakongresista. Sa pag-apil ni Ronald sa BO-PK, di na mokampaniya si Tony batok kang Tomas kay naa god iyang anak diha.

Ang gikuyawan man god ni Tomas nga mag-anib ang puwersa ni Tony ug Atan ug delikado siya. Unya nisaad man usab si Tony nga di siya magsaba-saba sa eleksyon.

Kay plano man niyang magpatudlo isip ambassador. Usahay kita ray gitunto aning mga pulitiko. Mag-away-away kunohay, unya mag-uliay ra diay gihapon.

(bgnalzaro@gmanetwork.com)