MAKIGPINUSTAANAY si Mayor Tomas Osmeña nga di mohinayon og lansar ang iyang ig-agaw nga si kanhi Sen. Sonny Osmeña sa pagkamayor dinhi sa dakbayan sa Sugbo sa sunod tuig nga piniliay. Tiaw nimo kanang, matod pa sa mga mahilig sa sabong o tigbakay, nga lugro ang pusta ni Tomas. Uno dyes gud. Ang iyang P10 mil kontrahan lang og usa kalibo ka pesos.

Tantaw bitaw nako nga kining kalaki ni Sonny morag panghudlat lang. Morag panglawgaw lang ba. Di siya seryuso sa iyang plano. Una, miingon siya nga modagan siya kay nangluod siya sa Liberal Party gumikan sa pagtudlo si Konsehal Hilario Davide III nga wa kunsoltaha ang mga lider sa gibanhaw nga Panaghiusa Party.

Sun.Star accepts donations for victims of Typhoon Ondoy

YAMA-YAMA

Niadtong miaging adlaw, niingon na usab si Sonny nga iyang kuhaon nga bise mayor si Tomas. Kay kon modaog sila, mo-resign dayon siya human sa tulo ka adlaw ug iyang itugyan ang pangagamhanan ngadto ni Tomas. Pastilan no, morag giyama-yamaan ra man ni Sonny ang mga botante dinhi sa dakbayan sa Sugbo. Mao nang ako makaingon nga panglawgaw lang kining iya. O ba kaha bunga na kini sa iyang pangidaron. Kanang uli-anon na ba.

Kon intresado siya nga moserbisyo sa mga Sugbuanon, dan iyang ipakita ang iyang pagkaseryuso. Iyang ipresentar ang iyang kaugalingon isip pulitiko nga maoy makasulbad sa problema sa siyudad. Di kanang modagan lang siya kay personal ang katuyoan. Mopili kaha ang mga tawo niya nga inig tulo ka adlaw mo-resign man diay siya kon modaog silang Tomas. Hinanggaw man ning kang Sonny. Pagkatuytoy!

DAGHAN NA SILA

Niining pagsulod ni Margot Osmena sa pulitika, daghan nang mga Osmena ang gustong magpapili sa sunod tuig nga eleksyon. Ambot og unsay nakapausab sa huna-huna sa unang ginang. Sa makadaghan nga higayon, nagdumili gayud si Margot nga mosalmot sa pulitika kay lagi di kini maayo. Gani siya man unta ang gusto sa mga kaalyado sa Bando Osmena Pundok Kauswagan (BOPK) nga maoy mohulip kang Tomas. Kini aron mapadayon ang plataporma de gobiyerno ni Tomas.

Sa wa pa mopakita og interes si Tomas sa south district, una sab kining gitanyag ni Margot. Apan iya gihapon nga gibalibaran kay lagi di siya ganahan sa pulitika. Pero karon naunsa naman ni? Modagan man lagi sa pagka-konsehal sa south district. Daghan na silang mga Osmeñaa. Naa si Konsehal Ritchie Osmeña nga magpapili pag-usab. Si Tomas sa pagkakongresista. Si Sonny ug Georgia pagkamayor. Akong nadunggan nga si kanhi Konsehal Rogelio ‘Jingjing’ Osmeña posibleng mobalik. Unya naa pa gyod si Rico Osmeña, kanhi mediaman, nga nagplano usab nga magpapili pagka-kongresista sa Cebu City north district. Pastilan no, ila na lang tanan.

(bgnalzaro@gmanetwork.com)