ANG tanang direksyon karon sa mga sakyanan og sa katawhan pag-ingon ngadto sa mga sementeryo aron ang mga buhi mohandom sa ilang mga mahal sa kinabuhi nga mitaliwan.

Mohalad kita og pag-ampo, pagdagkot oh kandila ingon man mga lukong sa mga buwak. Mao na kini ang naandan natong tradisyon labi pa kadtong naggakos sa tinuhuan sa Simbahan sa Romano Katuliko.

Sun.Star accepts donations for victims of Typhoon Ondoy

Apan kon ato baya nga istroktuhon, ugma pa baya, petsa dos, ang angayan mga ibisita sa mga sam-ang kay ugma gyod ang adlaw alang sa mga ordinaryo og yanong mga kalag. Karon, All Saints Day, adlaw sa mga santos. Busa espesyal karong adlawa.

Didto sa probinsya, ugmang adlawa maoy tingbisita.

Apan unsa-on man nga mao na,an gyod ning atong naandan nga karong adlawa ta mobisita. Na, hala.

PANGINABUHI

Kining pag-obserbar sa Kalag-Kalag nahimo na baya usab kining panginabuhian sa uban. Unang makasapi niini ang mga nagtrabaho sa mga sementeryo. Kanang mga sepulturero. Kay sila man gyod na ang kuhaon aron paglimpiyo sa mga nitso. Paghimo o pagpintal sa lapida.

Unya ang mga namaligya og mga kandila ug mga buwak. Ang uban nananum alang lang gyod ning maong okasyon. Puwerting mahala ra ba karon sa mga buwak. Morag mipaburot pod og maayo ang mga nananum. Ang mga nanginabuhi usab sa pagbaligya og bisan unsa nalang. Sama sa pagkaon ug mga ilimnon. Di kanang makahubog ha kay ginadili kana.

Bisan mga paypay o tabon sa kainit sa adlaw. Bisan kadtong mga manabtan makaaapi usab kay mao may mangadye. Pero pagbantay mo anang mga peke nga mga pari ha nga maoy moresponsoryo.

Unya dako og pangayo.

DAKONG KRUS

Sa sementeryo usab nato mahimamat ang atong mga kabanay nga dugay na natong wala igkita. Kay usahay adto man man magkaabot sa sementeryo kay pareho man og dagkutan.

Morag mahulog sab ni og reunion. Sadya ra ba nang uban kay morag magparty didto sulod sa sementeryo. Magdala og pagkaon.

Ting-uli usab karon sa taga probinsya kay aron adto managkot didto. Long weekend karon kay gideklarar man usab sa Malakanyang nga usa ka special non-working holiday ugmang adlawa. Kini aron makalugar kita paghandom sa atong mga mahal sa kinabuhi. Na, kadtong di makalugar og pauli, adto na lang kita modaglot sa tiilan sa dakong krus sulod sa sementeryo kay ‘for general patronage’ man na. Happy Halloween.

[bgnalzaro@gmanetwork.com]