WALA man siguroy problema kon si Presidente Gloria Macapagal Arroyo magpapili og laing puwesto sa sunod tuig nga eleksiyon.

Duna man goy hugon-hugon nga posibling modagan si PGMA pagkakongresista didto sa iyang probensiya sa Pampanga o ba kaha magbise presidente uban ni Defense Secretary Gilbert ‘Gibo’ Teodoro, ang standard bearer sa partido sa administrasyon, Lakas- Kampi, CMD coalition.

Matod pa sa mga eksperto sa balaod, walay babag kon himoon man kini ni Arroyo. Sa atong Batakang Balaod, gidid-an lamang ang Presidente nga magpasubli human siya mapili og makalingkod og usa ka termino, balig unom ka tuig. Walay probisyon sa Konstitusyon nga nagdili sa Presidente nga magpapili og laing ubos nga posisyon.

Sun.Star accepts donations for victims of Typhoon Ondoy

Bisan pag modagan siya sa pagka-kapitan sa barangay.

BOTANTE ANG MOHUKOM

Hinoon, salikwaot lang kaayo paminawon nga magpapili siya sa ubos nga posisyon kay iya na god nga nahuptan ang labing taas nga political position. Aw, naa ra kana ni Arroyo. Dili kita makabuot ug makapugong niya. Ang mga kritiko ni Arroyo dili angayan nga mabalaka kon mahinayon man siya sa paglansar isip kongresista didto sa Pampanga o ba kaha isip bise presidente.

Kay ngano man? Ang mga botante ra ang mohusgar kaniya kon angayan ba siyang pili-on sa puwesto nga iyang gitinguha. Si Professor Randy David, kulumnista sa Philippine Daily Inquirer, nga taga Pampanga usab og kritiko ni Arroyo, mibahad nga iyang kontrahan si Arroyo kon molansar man kini didto sa Pampanga.

Tiaw nimo na, kon mapilde ni David si Arroyo, maka-uuwaw kaayo.

Unya sa bise presidente, naa sila Loren Legarda og Mar Poxas nga puwerting lig-una. Mahibaw-an ra unya nato ni inig file sa certificate of candidacy kon modayon ba siya pagpapili og ubos nga posisyon.

NANGLAYAT

Hinay-hinay naman nga nanglayat ang mga sakop sa Lakas, Kampi, CMD coalition ngadto sa laing partido. Daghan na ang mitapon ngadto sa Nacionalista Party ni Manny Villar og ingon man ngadto sa Liberal Party kansang standard bearer mao si Senador Benigno ‘Noynoy’ Aquino Jr. Unya gidudahan nga daghan pa ang nosunod.

Matod pa ni kanhi Speaker Jose De Venecia, kinsa original nga Lakas, CMD protesta kini sa mga sakop sa Lakas nga wala mahi-uyon sa pagnagtipon sa Kampi, ang partido ni Arroyo.

Laing rason, gumikan usab sa kahinay ni Teodoro sa mga surveys.

Nangandam ug naniguro lang daan ang mga meyembro niini kay dili sila gusto nga maparot uban kang Teodoro.

Aw, mao naman gyod kining atong mga pulitiko morag gapnod nga magpalutaw-lutaw lang og magpa-anod asa tong sug.

(bgnalzaro@gmanetwork.com)