Nalzaro: Tambling

Wednesday, May 5, 2010

UNSAY nagpaluyo sa kamatayon ni Cresistomo Llaguno alyas Tata Negro, kinsa na-ila nga nahilambigit sa kalihukan sa illegal nga drugas? Pulitika o sa illegal drug trade? Kon sa police investigation pa, mohimo kuno kita og elimination process niining duha ka mga anggulo. Si Tata Negro midagan pagkakonsihal sa north district dinhi sa dakbayan sa Sugbo.

Kon sa pulitika, morag layo ra siguro ang posibilidad. Kay ngano man? Konsihal ra gud ning iyang gidaganan ug dili kaayo init ang panagribal sa mga konsehal kay walo man kabuok ang pili-on. Mahitabo lang ning patay kon init kaayo ang panagtigi labi pa kon one on one sama sa pagkakongresista, gobernador ug mayor. Kinsa gud ang mopapatay ni Tata Negro nga kaatbang nga wala man gani siya mosulod sa magic 8 sa mga surveys.

Have something to report? Tell us in text, photos or videos.

Click here for Election 2010 updates

PROTECTOR

Nahilambigit sa kontrobersiya ang iyang pangalan karong bag-o human gituki pagbalik ni James Philip 'Jimboy' Tionko ang pasangil ni Mayor Tomas Osmeña ngadto kang Vice Mayor Mike Rama nga drug protector. Niadtong miaging tuig si Rama maoy mibaraw sa kapulisan sa dihang dakpon na unta kini si Tata Negro. Kay lagi kaila sila ug kauban magduwa og basketball. Mao toy hinungdan nga gihinganlan ni Tomas si Mike og drug protector.

Dili sab siguro si Mike maoy nagpapatay kang Negro aron mahunong kining isyu.

HIRED KILLER

Dako ang posibilidad nga kabahin sa illegal nga drugas ang hinungdan. Akong nahinabi ang suspect nga si Jimmy Diala, kinsa nadakpan sa kapulisan. Sa iyang asoy nga gi-recruit siya sa usa ka Rendo Chavez nga iyang paisano sa Siaton, Negros Oriental aron manarbaho dinhi sa Sugbo. Apan pag-abot nila dinhi niadtong miaging semana, gimanduan siya ni Chavez nga ipapatay si Negro.

Kay kon dili niya patyon, siya maoy patyon ni Chavez. Gihatagan siyag litrato ni Negro. Wala siya makadawat og bayad gikan ni Chavez. Tuod man nahitabo ang pagpusil ni Diala kang Negro sa dihang nangampaniya ang biktima sa Lorega niadtong Martes.

Nadakpan usab si Diala. Gani mi-angkon man siya sa akong interview nga iyang angkunon kining maong salaod ngadto sa korte. Ako usab nga nahibaw-an gikan sa mga tinubdan nato sa kapulisan nga si Tata Negro, mitambling kini og balig 6 milyones ka pesos nga kantidad sa drugas gikan sa usa ka drug dealer didto sa kauluhan nga taga Sugbo ra usab. Ang buot ipasabot anang tambling nga mi-angkat og drugas unya wala mabayari ang supplier. Aw, ihaw noon.