DAGHAN ang naanugnan ni Senador Francis ‘Chiz’ Escudero human siya milayat gikan sa iyang partido ang Nationalist People’s Coalition [NPC]. Gawas nga nilukso siya, iya pa gyud nga gisaway ang political parties dala ang pag-ingon nga di kini maayo sa usa ka kandidato sa pagka presidente nga magpasilong sa partido kay mamahimo siyang diktahan.

Wa lang mahunahuna ni Chiz kon unsa ka importante ang partido sa gustong magpapili sa pagka presidente sa nasod. Ang partido dunay plataporma de gobyerno. Adunay prinsipyo. Ang importante sa tanan mao kini ang makahatag og makinarya sa kandidato labi pa gyud sa pundo. Ang importante sa usa ka kandidato mao gyud ang pundo. Lisod baya tuyukon ang tibuok nasod og wa kay bala. Ang mga kandidato sa lokal anha magyangungo sa mga kandidato sa national.

Sun.Star accepts donations for victims of Typhoon Ondoy

BARUGANAN

Nakadayeg ako sa baruganan ni Chiz. Apan ang kamatuoran god sa pulitika mao man god ang insaktong makinarya. Kon wa ka ana, aw, lisod ug tungason pag-ayo. Sumala sa kasaysayan sa pulitika sa atong nasod og duna bay nidaog sa pagkapresidente nga independente? Wa. Pulos gyud adunay partido.

Gumikan sa maong pamahayag ni Chiz nga nagsaway sa mga political parties, posibleng magapos na siya niini. Di na siya mamahimong magbise presidente nila ni Manny Villar sa Nacionalista Party o ba kaha kang Gilbert Teodoro sa Lakas, Kampi CMD gumikan kay naa man sila sa partido.

Unya sa reelection ni Chiz sa 2013, mag-independente na siya? Morag sagubangon ang iyang posisyon karon. Humot ra ba unta si Chiz sa mga batan-on kay maayo ang iyang karisma. Pero unsaon man nga mao may iyang nakab-ot nga desisyon. Di pa siguro siya angayan nga mamahimong Presidente. Wa na siyay purohan.

KLARO-KLARO NA

Samtang nagkaduol na ang pagsubmiter sa certificate of candidacy, morag miaksyon na og katin-aw ang dagan sa pulitika sa nasudnong eksina. Klaro na nga pipila na lang ang nahibilin nga desidido gayud nga magpapili sa pagkapresidente. Kaniadto puwerteng daghana. Karon hayag-hayag na gamay. Una, si Villar wa nay makapugong. Kay matod pa niya wa na siya magkinahanglan og amot sa ubang negusyante.

Unya ang tandem nila ni Noynoy Aquino ug Mar Roxas sa Liberal Party. Daghan naman gani ang nitapon ngadto sa ilang kampo gumikan kay nag-una gihapon sa mga surveys si Noynoy. Ang sa administrasyon, hapit na usab maplantsa. Si Gibo Teodoro gyud ang mamahimong standard bearer bisan kanunay nangiwit sa mga surveys. Ambot lang kaha kini si kanhi Presidente Joseph Estrada og di ba kaha kini mo-withdraw ultima ora. Mao ni giingon sa Tagalog ‘nga matira ang matibay’.

(bgnalzaro@gmanetwork.com)