Bobby Nalzaro
Saksi

NISIMPATIYA ako niadtong mga kabanay sa mga pasahero nga naapil pagkalunod sa MV Princess of the Stars, usa ka tuig na ang nakalabay nga hangtod karon wala pa makita o ma-ilhi ang patay’ng lawas sa ilang mga mahal sa kinabuhi. Dili lalim kining mawad-an ta ug kabanay nga wala ta masayod kon asa sila karon.

Mas maayo kadtong makit-an bisan patay na kay nahatagan sila og desenteng lubong sa ilang mga kabanay. Nahiluna og nakapahuway na ang ilang mga kalag.

Karong bag-o nimando ang korte nga ugkaton kadtong 38 ka mga patay’ng lawas nga gilubong niadtong miaging semana aron mahimo-an og dugang examination og ma-ila aron makuha sa mga kabanay.

Para nako wala na kini pulos. Ambot og unsay tumong sa taga Public Attorney’s Office (PAO) niini nga ila pa man gayod nga ugkaton.

For updates from around the country, follow Sun.Star on Twitter

Matod pa ni PAO chief Persida Acosta nga adunay gropo sa mga independent forensic experts nga andam motrabaho aron sa pag-ila sa wala pa ma-ilhi nga mga biktima.

Ga-usik-usik man lang kini sila og kuwarta.

PAPAHUWAYON

Kanang PAO dili na unta angayan silang manghilabot niini.

Wala ba silay pagsalig sa gihimo sa taga National Bureau of Investigation-Disaster Victims Identification (NBI-DVI) team og sa Interpool nga maoy mi-ila sa mga biktima pinaagi sa DNA test?

Unya ang mga eskperto ra ba nga ilang kuhaon mao ang mga anthropologists sa University of the Philippines (UP).

Matod pa sa mga experts lahi ang trabaho anang mga forensic experts og mga anthropologists. Naglalis na hinoon sila kon unsay pinakakomprehensibo nga paagi sa pag-ila og mga patay’ng lawas.

Maayo nalang siguro nga ato na lang kanang papahuwayon ang maong mga patay aron usab mahiluna intawon ang ilang mga kalag.

Lisog ra ba nang mga patay dili makapahuway kay magrigor usab ang ilang mga kalag. Hinaot nga kadtong mga kabanay sa mga pasahero nga wala pa igkita, makadawat na sa kamatuuran.

Inig abot sa kalag-kalag o ba kaha sa anibersaryo sa pagkalunod sa MV Princess of the Stars, adto na lang sila halad og mga buwak og dagkot og kandila sa tiilan sa dakong krus.

SIYA NA KAHA?

Gipasakaan og kaso sa kapulisan ang usa ka Allan Senogat nunot sa pagpamanhig patay ni Cebu City Assistant Prosecutor Patrick Brian Osorio. Apan mas daghan ang mga pangutana ang mitumaw kay sa mga tubag ning maong kaso. Matod pa sa mga imbestigador nga si Senogat mao ang nagmaniho sa motorsiklo nga gisakyan sa mamumuno sa piskal.

Dili ako buot mokuwestiyon sa atong mga imbestigador kay pinasikad man kaha sa ebedensiya ang ilang pagpasaka og kaso.

Apan ako lang silang pahimangnuan nga lahi ang imbestigasyon og ang prosekusyon. Ang mga piskal nga mo-prosecute sa kaso magdepende lang usab sa mga ebedensiya nga gisubmiter sa mga imbestigador.

Daghang nang kaso nga napalpak ang mga imbestigador sama niadtong kaso ni kanhi Sta. Fe Mayor Rogelio Illustrisimo Sr. Gumikan kay huyang ang mga ebedensiya, di absuwelto ang suspetsado nga si kanhi PO1 Arnulfo Pigon.

(bgnalzaro@gmanetwork.com)