SI Lapu-Lapu City Mayor Arturo Radaza, iyang asawa si Paz ug mga city officials kanunay nagpagawas og advertisement sa newspaper nga nagpa-abot sa ilang pasalamat ngadto kang Presidente Gloria Macapagal Arroyo ug ingon man sa Kongreso gumikan sa pagpasar sa balaod nga naghimong lone congressional district sa Lapu-Lapu.

Apan ang dakong pangutana og nganong wa gyod nila gi-apil ang pangalan ni 6th district Rep. Nerissa Soon Ruiz, kinsa mao ang nangamahan sa maong balaod?

Ato sigurong pahinumduman si Radaza ug ang mga opisyales sa dakbayan nga kon wala pa mohimo og lakang si Inday Nerry dili kana mahitabo. Kon ang Mandaue pa unta ang iyang gi-una, wala untay Lapu-Lapu lone district. I-apil unta nila sa pagpasalamat si Inday Nerry bisan sa ilang kasungi-an sa pulitika.

Morag wala man silay utang kabubut-on ngadto sa kongresista.

Sun.Star accepts donations for victims of Typhoon Ondoy

Magpapili

Unya nganong ila mang gi-apil si Paz sa ilang mga hulagway nga nigawas sa mga pamantala-an nga di man siya opisyal sa dakbayan.

Nahibawo naman kita nga si Paz maoy mosunod sa trono sa iyang bana. Libreng publisidad ni Paz. Unya kinsa may nagbayad sa maong advertisement? Ang mga magbubuhis? Hayahaya nila no?

Ang mayor nipakita usab og interes nga magpapili sa pagkakongresista sa bag-ong lone district sa Lapu-Lapu.

Wa siya kuyapi. Atong ipahinumdom ni Boy Radaza nga lahi ang trabaho sa mayor ug sa usa ka kongresista. Ang mayor puwedeng dili motabi.

Apan ang kongresista motabi gyod. Unsa-on man niya pag-debate sa iyang mga balaodnon didto sa hawanan sa Kongreso nga dili man siya makamaong mo-estorya. Dili man gani motingog sa media.

Mora ra og nagpili og amang nga kongresista ang taga Opon kon ilang pilion si Boy Radaza. Mobuka lang baba kon dunay roll call. Pagkatoytoy!

Ka Victor

Si Provincial Board Member Victor Maambong mipadayag na sa iyang intensiyon nga magpapili sa pagkakongresista sa ika-unom nga distrito nga langkuban na lang sa Mandaue City, Consolacion ug Cordova. Mao nay hinungdan nga sa pagkakaron nagpakitang gilas diha si Ka Victor sa Hunta Probensiyal. Siya maoy nangusog nga utingkayon kanang anomaliya sa pagpalit sa Kapitolyo sa Balili Property.

Daghan na siya og gipanabi nga dili maayo ang gihimo sa Kapitolyo og iyang gibasol si Kagawad Juan Bolo. Nakalimot siguro si Maambong nga siya maoy co-author ni Bolo sa resolusyon nga naghatag og katungod ni Gov. Gwen Garcia pagpalit sa maong luna. Wala man gani siya makabadlong anang illegal quarry operation sa iyang mayor sa Consolacion nga si Avelino Gungob.

Unya siya pay chairman sa committee on environment sa Provincial Board. Pagkatoytoy gihapon.

(bgnalzaro@gmanetwork.com)