MOSAKA na’g laing andana ang kalidad sa kombati sa Cebu Schools Athletic Foundation Inc. (CESAFI) sa pagsugod sa quarter-finals karong hapon sa University of San Carlos (USC) gym.

Ang teams sa University of Cebu (UC), nga pulos nahimong no.1 team human sa eliminasyon sa high school ug college divisions, makigparang sa puwersa gikan sa Don Bosco Technological Center (DBTC), nga pulos sab no. 8.

Sun.Star accepts donations for victims of Typhoon Ondoy

Mag-abot ang UC Baby Webmasters ug DBTC Baby Greywolves sa premirong duwa sugod karong alas 4:30 sa hapon alang sa high school division unya mag-engkuwentro sa main game ang UC Webmasters ug DBTC Greywloves alang sa college category.

Ang UC teams, nga pulos gyud grabe ka inilog ning mga sangkaa, naggunit pa gyud og twice-to-beat nga bintaha hinungdan nga nagkinahanglan og milagro ang puwersa sa DBTC aron makaabante sa semi-finals.

Ang top four teams human sa eliminasyon mao ang nakakuha og twice-to-beat nga bintaha.

Ang Webmasters, nga ninghuman sa eliminasyon dala ang 7-1 nga record sa college division, ninglampornas sa Greywolves, 102-85, sa ilang engkuwentro niadtong
Agusto 18.

Sama sa naandan, ang Webmasters ni coach Rhoel Gomez magsalig og maayo sa ilang higanteng si 6-9 Junmar Fajardo lakip na nila ni Janssen Abella, Kevin Quilantang, Arvin Gomez ug Robinson Mohammad.

Sa ilang bahin, ang Greywolves ni coach Rudy Enterina mosandig sa abilidad nila ni Celso Colegado, Jefford Aldave, Alain delos Santos, James Georsia, ug Jayson Cabrilles.

Sa high school division, ang Baby Webmasters, nga miharos og daog sa walo nila ka mga tahas sa eliminasyon, mas bangis ningmakmak sa Baby Greywolves, 109-59, sa premiro sab nilang sangka.

Base niini, makita nga wa gyu’y dag-anan ang Baby Greywolves sa Baby Webmasters sa bisan asa nga departamento.

Hinuon, seguradong di gyud bastabasta magpalupig ang teams sa DBTC ug mokombati gyud sila kutob sa ilang mahimo hangtod aduna pay kinabuhi.