Obenieta: Dayag nga dagway
Friday, July 30, 2010
More Sections
DAGHAN ang mahadlok og lapok. Mora’g makapuling ang buling.
Bisan pa’g kubalon atong aping, wala gyod ta’y nawong ikaatubang kon gakamuritsing ta sa panan-aw sa uban.
Have something to report? Tell us in text, photos or videos.
Sagpa sa atong kadungganan kon tulisokon ta nga wala’y katungod manamin, ug dili angay panaminan. Wala’y madani nato kon nindot kaayo atong dagway sa basura isalibay.
Updates on President Benigno Aquino III's presidency
Aron ta duolon, kinahanglang humot ug tahom tang tan-awon. Aron ta kanunay duawon sa adunahan nga mga langyaw ug aron sila ganahan mobalik dinhi, kinahanglan nga dili sila malibat sa ilang masaksihan atol sa ilang paglulinghayaw. Ug kini mao’y tumong sa tulomanon alang sa turismo dinhi sa Sugbo. Pinaagi ini, sutoy pod ang pagpataas sa pangagpas: Maabtan ra unya puhon ang kalamboan lapas sa makalibat nga kangil-ad nga gapadayag sa kalisod sa bisan asang dapit sa nasod.
Nunot sa naandang tinguha nga mailhan ang Sugbo isip usa ka “world-class tourist spot,” gitumod ni Rep. Ramon “Red” Durano (Cebu, fifth district) didto sa Kongreso ang usa ka balaodnon aron maglumpayat pag-anhi ang mga turista gikan sa bisan asang suok sa kalibotan. Kon makapasar ang House Bill 1100, ilhon na unya ang isla sa Camotes isip yutang “alienable or disposable” aron sarang nang matukoran og dugang nga mga beach resorts ug hotels. Ay, maayo kaayo ni aron ang makit-an sa mga langyaw dili lang lawod sa mga payag ug uban pang nagkagusbat nga sanglitanan sa kahimtang sa atong kapupod-an.
Sa laing bahin, gipasiugdahan sa dakbayan sa Sugbo ang usa ka Super Beautification Council (SBC) aron malimpyohan ang kadalanan. Matod ni Mariquita Salimbangon-Yeung, nga mao’y gitugahan sa City Hall isip pamuno sa SBC, daghan kuno ang nanawag niya ug nag-awhag nga dili na pasagdan nga magpasad ang mga basura. Wa’y lalis nga nindot pod kon matamnan ug manuyhakaw ang mga buwak sa kadaplinan. Ay, tan-awon nato kon maatiman ba pod sa SBC ang paghipos sa mga libod-suroy nga batang bulingit, mga buang, mga makililimos, mga mangunguot, ug mga manglabni sa mga bag, alahas, ug cell phone.
Pastilan, kadakong sampalong sa atong apapangig kon masaksihan sa atong mga bisita nga tulingig kaayo ang kadaghanan nato sa pagpangita’g paagi lagbas sa kakha-tuka nga pagsagubang sa kagutom.
Lisod kon sa ilang pag-uli sa tagsa-tagsa nila ka nasod gikan sa ilang pagduaw diri, lakip sa ilang ipangsangyaw ang mga nagkagidlay nga panikaysikay sa mga pampam nga nagkadaghan ug naglakip na sa mga lab-as pa’g panglawas. Dili pa ba igo nga gilkan ang bugan sa mga turistang butakal samtang gihapyod-hapyod ilang kinatawo pinaagi sa hugyaw kaayo nga “lingam massage” nga lakip kuno sa gidalit sa mga tourist guides?
Pwera buyag, ang kanindot sa atong palibot dili unta mahayagan gikan sa daob sa gatipun-og natong kauwaw nga labaw pa unya’g labyog sa santilmo, magdan-ag anang maskara sa mainiton nga pahiyom ug bungi nga tingsi alang sa turismo.
