Obenieta: Kandila sa mga kandidato

Friday, March 12, 2010

SAGPA sa mga swapang ang pag-atubang sa sanglitanan ni Kristo.

Wa’y lalis nga langitnon ang paghalad sa kaugalingon pinaagi sa pangalagad sa katawhan.

Have something to report? Tell us in text, photos or videos.

Ug kini mao’y buot panaminan sa mga kandidato nga kuwang na lang manghilam-os og bendita samtang latos sa atong dunggan ang lanog sa lingganay alang sa umaabot nga piniliay.

"The Manny Pacquiao Blog". Click here for stories and updates on the Filipino boxing champ.

Apan, pwera buyag, makawingig kon kinsa nila mao’y angay tuohan kay tataw nga wa’y kalainan ang ilang gipadayag lakip sa ilang mga pasalig. Bisan pa’g kuyaw malumos sa lunop sa ilang laway, wa’y kutas ilang kapakapa sa pagpamatuod sa ilang kaayo, katakos, ug kahibalo.

Wala ni sila’y santoson sa ilang tinguha nga kalawaton pod ang ilang tagawtaw sa mga botante. Bisan niining panahon sa Kuwaresma, mohunong kaha ang kalandrakas sa ilang kampanya?

Bahala’g kilatan, maglumpayat gihapon sa lumbaanay ang mga pulitiko kon kinsa’y labing maayo mobatbat sa Siete Palabras.

Bahala na’g naespidno ang nasod sa kalisdanan tungod sa pamulitika nga nasangit sa sungay sa demonyo.

Tataw nga di gyud ta nila lung-an pagminaw sa ilang pagsangyaw kabahin sa kaluwasan. Ay, lapaw sa atong atuli ug lupigon pa hapit ang wali sa pari.

Pastilan, lagmit kana mao’y hinungdan nganong nanginit ang dunggan sa mga sakop sa Dilaab Foundation. Gipamunoan ni Fr. Carmelo Diola, ang Dilaab Foundation usa ka “church-based” nga kahugpongan kansang tumong mao ang pagsilaob sa kahimatngon sa mga botante.

Aron mahitabo ang gipanghinaot nila nga “faith-impelled engagement of citizen” kabahin sa piniliay karong Mayo puhon, gilusad ni Fr. Diola ug kaubanan ang “Vote God” nga kalihukan “to evangelize politics…to provide spaces for a pastoral voice for Christians in public office.”

Kon kining damgo sa Dilaab Foundation makapukaw sa mga kandidato ug mga botante, ay, kadakong milagro! Kaayong isayaw og itik-tik sa atop sa simbahan kon lagsik pod nga maniid ug makisayod ang mga botante nunot sa matinud-anon nga laraw sa mga pulitiko alang sa katilingbanong kaayuhan.

Bitaw, sangyad gyud ang langit sa lapok kon dili na mahitabo ang gitawag ni Fr. Diola nga “original sin” sa piniliay sa nasod diin ang kinatas-an nga pagarpar sa mga pulitiko tugbang pod sa kinamangay nga tikas: “vote-buying” ug uban pa.

Kinsa kaha sa atong mga kandidato ang angay modawat sa bendisyon sa atong balota? Kinsa’y takos moluwas nato gikan sa nasudnong kalbaryo? Bisan kon wa’y kalainan sa kalabera ang pagsalig sa uban kabahin sa kausaban, ang gipakita sa Dilaab Foundation usa ka timailhan nga mahimong mabanhaw ra ang atong pagtuo. Labi na kon dili magmakuli ang kasagaran sa mga kandidato sa ilang paghinulsol. (geemyko@gmail.com)