KUYAW nga wala’y padulngan ug dili na mahaw-as gikan sa lapok nga gilu-nangan. Ingon ini kaubos atong pagtan-aw sa mga kabatan-onan nga namudmod sa ilang kalapasan ug pagkawala’y puangod. Gaapil-apil anang mga “gang” nga wala’y ayo. Wala’y laing tumong gawas sa pagpabadlong. Nalubong sa mga nagkadaiyang bisyo.

Nabutahan, nagduhiraw palayo sa maayong kaugmaon. Sayon kaayo kawton ang sampot samtang tulilik ang kalimutaw sa pagtubag niining tigmo: Unsaon pagluwas sa kaugalingon?

Sun.Star accepts donations for victims of Typhoon Ondoy

Mahimong kumkomon ang kausaban. Dili pa ulahi ang tanan. Kini mao’y gipamatud-an ni Efren Peñaflorida, 28, nga bag-ohay lang gisangway sa global television network nga CNN isip usa sa “Top 10 CNN Heroes of 2009.”

Di lalim ang iyang kadaogan. Gikan sa 9,000 ka mga nominado nga gituboy sa mga tigtan-aw sa CNN gikan sa 100 ka mga nasod gumikan sa ilang pag-antos ug maayong binuhatan, nituyhakaw gyod ang duha ka kamot ni Peñaflorida. Yati ra, pwerteng sayopa diay kon nagtuo ka nga ang kumo ra ni Pacman mao’y gamhanan, ug ang iyang pagkakampyon mao ra’y angay hangdan.

Labaw sa atong panghupaw nga ang paglaom mahisama sa usa ka ulod samtang gahitak ang mga suliran sa atong nasod, ang kadaogan ni Peñaflorida usa ka lagubo ug labihan kadakong dungog kanatong mga Pinoy. Pak-an nga pagdasig!

Labi na gyod sa kabatan-onan. Labi na gyod nato nga nalibat na mga kidhat gikan sa mga kandidato sa ninglabay nga mga piniliay.

Sanglit sa binuhatan ni Peñaflorida, dili diay kinanghanglang pabuwaon ang laway samtang mobalintong ug molatay ang dila tadlas anang tayaon nga alambre sa politika. Dili diay kinahanglang makiglumba og paugat, magpatagad nga sila mao’y saligan sa mga balota aron sila makaalagad sa katawhan.

Kabahin sa pagtugyan sa kaugalingon alang sa kabulahanan sa uban, daghan kaayo’g makat-onan ang atong mga kandidato kon ilang sundon ang mga lakang ni Peñaflorida. Ang iyang kampanya—ang pagtultol sa mga batan-on nakabsan sa paglaom ug nahitumpawak sa hinampak nga mga “gang—layo na gyod og naabtan.

Sukad gipalegrahan niadtong gaedad pa siya’g 16 kay nibalibad nga magpasakop sa a sa usa ka “gang leader,” siya takos nga mibarog sa pagtuo nga ang mga batan-on sama niya mahimo pang molingkawas sa hawla sa mga luog nga nagpalup-og sa kalisod.

Gitisok niya sa dughan sa iyang kahigalaan ang kamahinungdanon sa kaugalingong pag-uswag pinaagi sa pagkat-on. Sila iyang giaghat nga molikay sa panon sa mga “gang”aron magmabungahon.

“Instead of being discouraged, I promised myself that I would pursue education,” panaad pa niya. “I will strive hard; I will do my best.”