Myke U. Obenieta
Pungko-pungko

LABING lami kawton ang katol sa lapalapa. Na hala, pangutan-a ang bakol, ug iya kang tug-anan nga wala uroy makalabaw sa katagbaw sa pagsuroy-suroy. Bitaw, tam-is gyod bitaw palandongon nga makatilaw pod ta pagsuhid sa mga dapit nga sagad natong makit-an sa salida sa sine ug madunggan sa mga kanta.

Kabahin sa higanteng dakbayan sa New York, bisan ang wala pa makatilaw og duaw niining dapita—labi na kadtong gahangad nga makasinati sa America—dili gyod maglisod pagsabot nganong gitawag kini nga “Big Apple.” Kay dili gyod malilong ang iyang pagkamadanihon. Gani, gisuyop niini bisan ang nagdilaab nga mga mata sa mga terorista nga buot mopamatuod nga ang ilang kamangtas labaw pa sa gibuhat nilang King Kong, Godzilla, ug mga taga-laing planeta.

For updates from around the country, follow Sun.Star on Twitter

Apan gipamatud-an usab sa New York nga mahimo kining tan-awon isip timail-han sa kalig-on ug pagdumili sa pagkapukan bisan pa sa katalagman sa 9/11 ug uban pang kakulba sama sa gikatahong “economic recession” sa America ug sa tibuok kalibotan.

Tuod man, atol sa hapit duha ka semanang pagbakasyon nako uban sa akong banay didto sa New York bag-ohay lang, akong nasaksihan kon nganong angay kining himoong simbolo sa katumanan sa tawhanong tingusbawan. Bisan pa sa iyang kakutas ug kakuyaw nga sagad mao’y motumaw sa mga dapit nga mao’y gipunsisokan sa kadaghanan nga naglumbaanay pagpangita og kahigayonan sa pag-uswag, ang New York dayag gihapon nga nagpataas sa pabilo samtang gadan-ag sa mga daman ug damgo.

Wala gihapo’y pagkapalong ang sulo nga giisa sa Statue of Liberty, ug kini gipamatud-an gihapon sa bawod sa mga turista nga nagduot didto sa Manhattan hangtod didto sa Ellis Island. Bisan pa sa mga suliran nga gaapong karon sa America, nagpapiling buhi ang pagtuo nga naglutaw sa dughan sa mga unang dumuduong gikan sa nagkalain-laing nasod sa kalibotan nga buot makasinati sa gipadayag sa Declaration of Independence isip mao’y gasa sa Kahitas-an ug katungod sa tanan : kinabuhi, kagawasan, ug ang pag-apas sa kalipay.

Ay, buhi kining masinati sa mga nagtapun-og nga mga pasahero sa mass transit trains na naghadyong sa mga subway sa New York. Makita mo kining kainit sa pagsaulog sa kinabuhi samtang wa’y puas ang pagpunsisok sa mga buot mosaksi sa bantayog sa tawhanong mugna nga masaksihan dili lang sulod sa mga wanang sa daghang mga museums ingon man mga pasundayag sa Broadway. Masaksihan usab kini sa daplin sa kadalanan, sa mga subway, ug sulod sa mga plaza sama sa Central Park, Washington Square didto sa Greenwich Village ug uban pa.

Ang mga kisaw sa katawhan ug mga kidlap sa kahayag didto sa Times Square inig pislok sa adlaw mao’y mahimong sanglitanan nganong ang kapintas ug kapakyas wala’y sarang gahom kon itandi sa kahabog sa tawhanong panlimbasog. Masaksihan pod kini sa kusganong pagpabarog sa usa ka memorial park ug labaw pang tul-id nga mga edipisyo hulip sa napulpog nga Twin Towers sa World Trade Center. (geemyko@gmail.com)