UNSA kaha’y ikasulti sa amang ngadto sa buta?

Daghan tuod ang gapangapkap kon unsa’y padulngan sa nasod. Naglugitom kuno ang kaugmaon kon magpadayon ang naandang’ paagi sa atong pamolitika. Maayo pa nga motiurok na lang, ug ilubong ang mga panghupaw pinaagi sa pagluom. Kon sila’y pangutan-on, pastilan, ulahi na kuno ang tanan.

Apan asa man tawon ta puniton kon patuyangan na lang ang panglantaw sa mga napagngan na’g paglaom?

Sun.Star accepts donations for victims of Typhoon Ondoy

Karon nga nagkaduol na ang piniliay, wala’y preno na pod ang mga kandidato sa paturagas sa ilang laway. Ay, dili na kinahanglang balik-balikon nato’g patukar ang buak nga plaka sa ilang mga pagarpar duyog sa kapuol sa atong mga katahap ug mga bagulbol.

Kon maghisgot ta’g kausaban, tingali mahitabo ra kini inig mosugot ang mga kandidato nga dili sila magtingog panahon sa ilang kampanya. Aber, tan-awon kuno nato kon mahimo ba nga buhat nila mao’y pasultihon.

Bitaw, kon wala sila’y laing gimanggad ug gipaninguha gawas sa katilingbanong pangalagad, dayag tingali nga dili sila kinahanglan pang pangitaan sa katawhan og mga timailhan sa ilang pagkaligdong ug pagkakugihan. Dili na ta magduhiraw ug makakita hinuon og aninipot inig pagpamatuod nga ang sangpotanan sa piniliay maghatag og kaayohan sa kinabaag-an.

Mao bitaw nga alingungog kaayo karon ang panawagan ug panlimbasog nga bag-ohon ang nagkagidlay nga nuog sa atong pamolitika. Ah, kalami paminawon: Kausaban!

“If you want to make enemies, try to change something,” matod pa ni Woodrow Wilson, kanhi pamuno sa Amerika.

Kon mao, ay, kinsa kaha’y unang mabun-og ug mabulhog sa dakbayan sa Sugbo diin bag-ohay lang nitumaw ang usa ka bag-ong partido—“OUR (Opportunity, Unity, Reform) City”—aron kuno “makaangkon ang mga Sugboanon sa bag-ong matang sa politika nga alang sa kahiusahan, di magbahinbahin.” Sumala pa sa gatukod ning maong politikanhong hugpong, mao ni ilang batokan: “Black propaganda, name-calling, negative campaigning are all stuff from the mould of traditional politics. These are the kinds of politicking that our people want their leaders to leave behind.”

Maayong pagkasulti, dili malalis. Apan kining maong pamahayag dili sarang isip plataporma nga sarang nang saligan sa mga botante aron matultolan sila sa mga pamaagi kon unsaon pagpatuman sa gidamgo nga dakbayan: Hapsay ug malinawon. Limpyo ug dili daling bahaan ang kadalanan. Mauswagon.

Kanang gihisgotan nga kahigayonan, kahiusahan, ug kabag-ohan dili ba mao ra pod ang giyamyam sa mga kandidato kaniadto nga karon mao na’y galingkod sa kagamhanan? Dili kaha sila mapungot ug magdumot na hinoon batok sa pasangil ning bag-ong pundok?

(geemyko@gmail.com)