Ospital napuno sa mga pasyente, wa manawat

Thursday, September 2, 2010

MANDAUE City District Hospital wa na modawat og mga pasyente tungod sa kapuno na tungod sa pagsaka og maayo sa mga kaso sa dengue fever nga naa sa tambalanan.

Kini maoy gikompirmar sa usa ka staff sa district hospital hinungdan nga wa na sila modawat og mga pasyente.

Have something to report? Tell us in text, photos or videos.

Updates on President Benigno Aquino III's presidency

Si Marelle Marie Benabaye, staff nurse, nibutyag nga ang ilang tambalanan mosulod og 50 ka mga pasyente.

Hinungdan nga  kutob sa mga pasyente nga moanha sa ilang tambalanan ila kining refer sa laing tambalanan agad sa ilang gusto human nila madapati og pasiunang tambal.

Gipasabot ni Benabaye nga wa gayod gitugot sa ilang tambalanan nga magdoble ang mga pasyente sa usa ka katre.

Samtang labaw nang wa sila motugot nga ang pasyente na maoy magdalag katre sama sa nahitabo sa ubang mga tambalanan.

Hinuon ilang gitataw nga di mga kaso sa dengue ang pulos na-admit kon di apil na ang ubang mga sakit.

Si Dino Valera, sa infection control committee sa tambalanan ug maoy emergency room supervisor, niingon nga sa buwan lang sa Agusto adunay 25 ka mga tawo ang na-admit tungod sa dengue.

Kadaghanan niini pulos mga bata samtang nag-edad og 45 ang labing tiguwang.

Iyang gibutyag nga ang 25 ka mga na-admit maoy labing taas nga ilang na-record sa tambalanan sukad masukad.

Sa miaging tuig gikan sa Enero hangtod Agusto aduna lang silay 10 ka kaso sa dengue apan nisulbong kini karon.

Hinuon sa 25 ka mga pasyente way bisan usa niini ang nakabsan sa kinabuhi samtang gihimakak usab sa tambalanan ang report nga nahutdan na silag supply sa dextrose.

Kagahapon adlawa adunay pito ka mga pasyente nga dunay dengue fever ang padayon pang gi-admit sa district hospital.

Ang mga kaso sa ubang nanga-admit wa pa masuta kon mao ba sab ang nitakboy kanila nga sakit.

Sa ubang mga tambalanan sama sa Cebu City Medical Center (CCMC) ug Vicente Sotto Memorial Hospital, ningdagsa sab ang mga kaso sa dengue fever.

Mga kaso sa dengue dinhi sa Sugbo ug sa Central Visayas mingsaka og maayo, apan mingminos ang nangamatay. Sagad mahitabo kini panahon sa ting-uwan.

Niawhag ang Dept. of Health sa publiko nga manglimpyo sa palibot.