MOKABAT sa P6.7 milyunes ang danyos sa sunog sa milabayng gabii duol sa barangay hall sa Lahug, dakbayan sa Sugbo.

Kandila nga gigamit sa pamilyang naputlan og kuryente ang gitumbok nga posibleng hinungdan sa sunog mga alas 8:45 sa gabii ug nakontrolar sulod sa 48 minutos.

Sun.Star accepts donations for victims of Typhoon Ondoy

Ang sunog gitumbok nga didto magsugod sa balay ni Simplecio Magno nga ginama sa light materials.

Nagpuyo niini ang iyang mga anak ug mga apo.

Sigon sa pasiuna nga inpormasyon nga didto magsugod ang kayo sa lawak nga giukopahan ni “Amay,” usa sa mga apo ni Magno.

Sigon pa ni David Magno nga didto sa balay sa iyang igsuon nga si Francisco Magno nagsugod ang kayo.

“Didto man na sa ilang kusina nagsugod ang kayo pagkamatngon nako kay di naman madala og pawong”, dugang ni David sa interbyu sa Sun.Star Superbalita.

Dason pa niya nga kasamtangang gipuy-an sa anak ni Francisco nga si Janet Magno Nable ang balay diin nag-inom kini sa gawas sa pag-ulbo sa sunog.

Si FO3 Antonio Gonzales, imbestigador, niingon nga ilang ipatawag ang tagbalay ug ingon man usab ang mga silingan nga unang nakadiskubre sa sunog.

Matod ni Gonzales nga ipaubos pa sa imbestigasyon ang hinungdan sa pag-ulbo sa kayo.

“Di pa gyud ta mo-conclude ana, kay ato paman ning ipatawag kining Magno para imbestigahon”, dugang ni Gonzales dihang nahinabi sa Sun. Star Superbalita.

Si City Fire Marshall Esmael Codilla niingon nga tungod sa kakuwang sa crowd control nalangay sila sa pagkumbate sa kayo.

Iyang gipanghimakak ang pasangil nga nadugay sila pagresponde sa alarma, hinungdan nga daling nakadako ang kayo.

Matod ni Kapitan Maryann de los Santos nga dugay niabot ang mga bumbero hinungdan nga daling nakadako ang kayo ug daghan ang balay nga nangaamong bisan pa man kon daplin ra kini sa dalan.

Apan subay sa nakuhang inpormasyon sa Sun. Star Superbalita nga gikan sa control tower sa Cebu city Fire Station, unang nakaresponde ang Engine 12 sa Mabolo Fire Station kay ang firetruck sa may brgy. Lahug wa makaresponde kay naguba. LEE MARK TEJERO-correspondent