GIDUMOG gyud si pound-for-pound champion Manny Pacquiao sa iyang paghiabot sa lobby sa MGM Grand Graden Arena sa Las Vegas kagahapon unya paglabay sa
usa ka oras kapin, nisunod pag-abot si Miguel Cotto apan nimingaw-mingaw la’g kalit ang palibot.

Mao kini ang senaryo nga gitaho sa Las Vegas Sun, inilang pamantalaan sa Las Vegas, sa pag-abot sa duha ka mga boksidor, nga mag-engkuwentro karong Dominggo (RP time) sa MGM Grand.

"The Manny Pacquiao Blog". Click here for stories and updates on the Filipino boxing champ.

Hinuon gipasabot ni Cotto nga di na bag-o alang kaniya ang maong esena ug iya na kining nasinati sulod sa pipila ka mga higayon nga dungan silang nag-promote ni Pacquiao sa ilang away nga giulohan og “Fire Power.”

Giangkon ni Cotto nga mas daghan gyud og mga sumosunod ni Pacquiao apan di kini makaapekto kaniya sa rason nga way bisan usa ka dumadapig ang makatabang kang Pacquiao inig abot na nila ibabaw sa ring.

“I’ve known since we agreed to do this fight that it’s just going to be me and him in the ring,” matod ni Cotto sa interbyu sa Las Vegas Sun.

“When we get in there, no one can help Manny. No one can hand him something to hit me with. I expected it to be like this. Everything Manny has, he has earned.”

Si Pacquiao (49-3-2, 37 KO) nagtinguhang moilog sa World Boxing Organization (WBO) welterweight title ni Cotto (34-1, 27 KO) aron pagkulit og kasaysayan.

Kon mahitabo kini, si Pacquiao maoy labing unang boksidor sa tibuok kalibutan nga nakalangkat og titulo sa pito ka mga managlahing weight divisions.

Nakuha niya ang labing una niyang world title niadtong 1998 pinaagi sa 8th round KO nga kadaugan batok sa mas inilog nga si Chatchai Sasakul sa ilang WBC flyweight title bout.

Human niadto, wala na gyud kapugngi ang Pambansang Kamao sa Pilipinas.