Pacquiao naghunahuna nga moundang na sa pamoksing

Monday, March 22, 2010

SA iyang pagbalik kagahapon sa nasod gikan sa kalampusan sa Dallas Cowboys Stadium diin iyang gibukbok sud sa 12 rounds si Ghanaian Joshua Clottey, nagbuhi’g timailhan si pound-for-pound champion Manny Pacquiao nga posible na siyang moretiro.

Si Pacquiao miabot kagahapon sa Manila sa alas 5:51 sa buntag sakay sa Philippine Airlines (PAL) flight PR 103 gikan sa Los Angeles, California.

Have something to report? Tell us in text, photos or videos.

“Maraming salamat sa inyong lahat sa walang sawang pagsuporta at nanalo naman ulit tayo. Ang laban ko rin ay alay ko sa sambayanang Pilipino at sa lahat ng sumusuporta sa buong mundo,” matod ni Pacquiao sa iyang pag-abot nga nakuha sa usa ka artikulo sa www.abs-cbnnews.com.

Click here for Election 2010 updates

Kauban ni Pacquiao ang iyang asawang si Jinky ug ang mga sakop sa Team Pacquiao nga sila si kanhi environment secretary Jose “Lito” Atienza ug kanhi Ilocos Sur Gov. Luis “Chavit” Singson.

Lakip sa ningsugat kang Pacquiao mao ang iyang mga anak nga sila si Jimuel, Michael ug Princess. Ang kamanghuran ni Pacquiao nga si Queen Elizabeth nagpabilin ra sa General Santos City.

Nisugat sab sa Pambansang Kamao mao si Nacionalista Party standard-bearer Sen. Manuel “Manny” Villar.

Sa press conference, nagkanayon si Pacquiao nga posibleng dili na niya ikaharong si Floyd Mayweather Jr. tungod sa posibilidad nga moretiro na siya.

“Baka malay mo baka hindi na ako umabot doon [pagpakigbatok kang Mayweather]. Baka mag-retiro na ako. Eh yung Mama [Dionisia Pacquiao] ko, nagmakaawa daw siya para lang ako huminto sa boxing so pag-uusapan namin,” batbat ni Pacquiao.

Gitataw ni Pacquiao nga wala’y kalambigitan ang iyang ambisyon sa pulitika kon uganing modayon siya sa pagretiro.

“Kahit naman wala ‘yung eleksyon, walang pulitika, depende na sa desisyon naming pamilya. Matagal na kasi ako, matagal na rin sa boxing. Marami na akong nabigay na karangalan sa ating bansa,” dugang ni Pacquiao kinsa midagan isip kongresista sa Sarangani Province.

Giklaro ni Pacquiao nga nakasabot gyud siya sa iyang inahan kay para kini sa iyang kaayuhan.

“Syempre after kay Cotto nakiusap ako sa Mama ko, ‘Isang laban pa.’ Pinagbigyan niya ako. Sa ngayon, paano pa ako makiusap ulit? Ano bang sabihin ko?” dugang ni Pacquiao.

Gikan sa Ninoy Aquino International Airport (NAIA), si Pacquiao milahos sa New World Hotel sa Makati City aron mamahaw ug mipahuway’g kadiyot.

Nisimba si Pacquiao sa Quiapo Church gikan sa hotel dayon mihatag og courtesy call kang Presidente Gloria Arroyo sa Malacañang.

Gikan sa Malacañang, nitunga si Pacquiao sa usa ka motorcade nga nanukad sa makasaysayong Mendiola Bridge.