BUOT ni Mandaue City Mayor Carlo Fortuna nga buhion pagbalik ang ordinansa nga nagdili sa mga motorista sa pagsul-ob og wrap around crash helmet nga gibabagan ni Mayor Jonas Cortes.

Kini gumikan sa pagsul-ob og full-face helmet sa mga tulisan sa LBC Kwarta Padala Express Courier Service kagahapon sa buntag hinungdan nga naglisod ang mga saksi sa pag-ila sa mga tulisan nga luwan sa duha ka managlahing mga motorsiklo.

For updates from around the country, follow Sun.Star on Twitter

Sa sayo pa, gibabagan ni Cortes ang pagpatuman sa ordinance no. 11-2009-498 o Ban of Wrap Around Crash Helmets.

Si Atty. Briccio Boholst, city administrator, nitataw nga buot ni Cortes nga ipaklaro diha sa ordinansa ang matang sa helmet nga gidili sa paggamit, sanglit nakita nga adunay depekto ang ordinansa.

Gihinganlan ni Boholst ang mga matang sa helmet sama sa ‘Flip flop’, open face, full face, off-road o motocross ug half helmet ug wa matino ang gipasabot sa konseho nga pag-ban sa wrap around crash helmets.

Pulong pa ni Boholst nga ang tanang helmet pulos wrap around hinungdan nga gi-veto ni Cortes ang pagpalabang sa ordinansa, gani niduso kini og suwat sa konseho niadtong Marso 16 niining tuiga.

Dugang pa ni Boholst nga ang maong ordinansa nisukwahi sa national law sa Land Transportation Office (LTO) nga nag-require sa mga motorcycle rider nga magsul-ob og helmets.

Di kay ang Mandaue ra ang nagtinguha niini apan daghan ang nakasaway kay mahasupak man kini sa nasudnong balaudnon nga naghimong rekisito sa mga magmotorsiklo sa pagsul-ob og helmet. (FVQ)