Pag-endurso di tinuod: Georgia

Thursday, April 29, 2010

GIHIMAKAK ni Lakas-Kampi-CMD Mayoralty bet Georgia Osmeña nga nitambong sa iyang pulongpulong si Cebu City Mayor Tomas Osmeña ug ni-endorso kini sa iyang kandidatura.

Nasayran nga dunay nadawat nga taho ang Sun.Star Superbalita nga nagpahibawong nitambong ang mayor sa pulongpulong ni Osmeña sa Buhisan ug gi-endorso usab kini ngadto sa Lorega ug Carbon.

Have something to report? Tell us in text, photos or videos.

Apan si Osmeña sa interview sa Sun.Star Superbalita nikatawa ug niingon nga wa gani siya makapahigayon og pulongpulong sa Buhisan. Hinuon wa siya masayod kon tinuod bang giendorso siya sa Lorega ug Carbon.

Click here for Election 2010 updates

Hinuon siya niingon nga bisan unsang suporta alang sa iyang kandidatura iyang hangpon apan di siya motuong mosuporta gyud kaniya ang mayor tungod kay si Bise Mayor Michael Rama man ang kandidato.

Ang Sun.Star Superbalita nakadawat og text message sa giingong pagduso sa mayor sa iyang igsuon.

Hinuon ang mayor sa iyang naunang mga pamahayag niingong di gyud siya mosuporta sa iyang igsuon ug si Rama sa iyang bahin kampante usab sa suporta sa mayor alang sa iyang kandidatura.

Apan alang kang Osmeña angay maghunahuna og maayo ang mga botante kon kinsa gyud ang ilang piliong mosunod nga mayor ilabina na sa uwahing isyo niini diin gideklarang public enemy number 1 sa usa ka grupo si Rama tungod sa pakigsuod niini sa usa ka giingong drug lord.

Gani mismong si Mayor Osmeña ang nitribukar nga “druglord protector” si Rama.

Ang gitumbok sa mao nga isyo mao ang pagpanawag ni Rama sa kapulisan ug pagpangutana kon duna ba silay search warrant dihang gironda ang pinuy-anan ni Tata Negro.

Hinuon si Rama sa iyang naunang pagpasabot niingon nga igo ra niyang gitino kon nisubay ang kapulisan sa lagda sa pagronda.

“It’s not right for a city official to get involved because that’s already under the jurisdiction of the police. Personally, I don’t want to have a mayor who is a close friend of any drug lord,” nagkanayon si Osmeña.

Si Rama mipasaka nag kasong libelo batok kang Tionko, kinsa iyang giingong grabeng nagpakauwaw kaniya ug sa iyang pamilya nga naila sa natad sa pulitika.

Apan si Tionko namahayag nga ang iyang gibasehan mao lang ang pamahayag sa mayor nga nabutang sa mga mantalaan sa miaging tuig kay wa siya makauyon sa gibuhat sa bise-mayor. (CPL)