WA madayon ang tinguhang pagkoral sa tag-iya sa luna sa sityo Villa Manga, barangay Opao dakbayan sa Mandaue kagahapon sa buntag kay giingong namato ang mga biktima sa sunog.

Ang tag-iya sa luna nga si Wilfredo Prada nagpa-blotter sa Police Station 5 sa Mandaue City Police Office sa mga alas 11:20 kagahapon sa buntag.

Sumala pa ni SP02 Danilo Barrita nga nagsugod na unta sa pagtukod og koral si Prada sa luna nga iyang gipanag-iya apan napakgang sa dihang nibabag ang mga namuyo sa maong dapit.

Sun.Star accepts donations for victims of Typhoon Ondoy

“Ang tag-iya (Prada) di gusto nga mamalik pa sila (fire victim), unya ang maong residente kay moalsa man kon koralon,” tipik sa pamahayag ni Barrita sa dihang nahinabi sa Sun.Star Superbalita.

Apan wa pa matino kon nakakuha ba og fencing permit si Prada diha sa barangay.

Kahinumdoman nga moabot sa 576 ka mga pamilya ang nawad-an sa ilang pinuy-anan sa dihang naigo sa dakong sunog niadtong Septiyembre 30 sa sityo Villa Manga, Opao Mandaue City.

Niadto lang miaging semana si Cebu Governor Gwen Garcia ni apod-apod og hinabang ngadto sa mga nabiktima diha sa Opao gymnasium diin mokabat sa kinatibuk-ang P352,000 nga cash gifts ingon man relief goods sama sa bugas, de lata ug noodles ngadto sa mga biktima sa sunog.