PAGPAAPIL sa katawhan ingon man transparency mao ang mga yawe sa kalampusan sa mga local government unit (LGU), matod sa mga opisyal sa usa ka forum niadtong Huwebes.

“In good governance, there is no political boundary,” matod ni Upi, Maguindanao Mayor Ramon Piang atol sa Understanding Choices forum.

Matod niya nga dihang siya napili nga mayor niadtong 2001, iyang gibuksan ang iyang administrasyon sa tanang sector aron moapil sa pagpadagan sa kagamhanan ug pulitika.

Si Piang niingon nga iya kining gihimo aron mosalig ang katawhan, labina sa ilang dapit diin naa ang mga lumad, Muslim ug Kristyanos.

Nagtukod siya og tri-people nga konseho nga gilangkuban sa mga stakeholder sa ilang lungsod aron maoy motagad sa mga kasungian ug uban pang mga problema.

Matod niya nga kaniadtong sa wa pa siya sa katungdanan, di gyud malikayan nga naa ang mga kasungian.

“Naubos ang panahon to settle, conflicts,” matod ni Piang, apan sukad siya napiling mayor nibalik na ang pagsalig sa katawhan.

Siya niingon nga tungod niini, miminos og 35 porsyento ang mga kaso nga nisangko ngadto sa police station.

Sa mga proyekto, iyang gigamit ang civil society alang niini, diin mohatag lang sila og pundo.

“Change could come and attained through empowered constituency,” matod ni Piang.

Samtang si Naga City Mayor Jesse Robredo niingon nga iyang gilambigit sa pangagamhanan ang mga non-government organizations kay sila “reflects the sentiment of the people.”

“Difficult problems can be made easier when people becomes part in problem solving,” nipasabot si Robredo.

Gawas niini, iya sab nga giseguro nga transparent ang iyang administrasyon sa tanang mga aspeto sa pagpadagan sa kagamhanan.

“Corruption can be minimized through transparency,” dugang ni Robredo.

Samtang si Isabela Gov. Grace Padaca niingon nga mas maayong tan-awon og una sa kagamhanan ang panginahanglan sa katawhan inay ang ilang tinguhang masublian sa pagpili. (REV)