NIPASANGIL ang inahan sa usa ka pasyente sa Cebu Doctors University Hospital nga gitanggong ang iyang anak sa tambalanan human sila napakyas pagbayad sa ilang responsibilidad sa tambalanan dihang nalandig niadtong Mayo.
Niini, si Flora Edillon, inahan sa usa ka magtutudlo nga si Aurora Edillon, nga naospital niadto pang Mayo 25 human nakasugat og vehicular accident, nisang-at og petition for habeas corpus sa korte niadtong Hulyo 1 nga nag-awhag nga makagawas ang iyang anak sa tambalanan.
Apan, ang abogado nga nirepresentar sa tambalanan nga si Cornelio Mercado nipadayag nga wa nila gitanggong ang pasyente.
Hinuon nipasabot siya nga ang pasyente adunay obligasyon nga ilang bayran ang ilang responsibilidad sa tambalanan.
Kagahapon, gihusay ni Regional Trial Court (RTC) Branch 19 Judge Wilfredo Navarro ang petisyon nga gisang-at ni Edillon ug nimando siya nga pagawason sa Cebu Doctors University Hospital si Aurora.
Wa makatambong ang pasyente sa korte kagahapon nga maoy hangyo sa inahan kay anaa pa siya sa tambalanan.
Moabot nag P600,000 ang kantidad sa bayranan nilang Edillon sa hospital hinungdan nga wa una sila pagawasa.
Gikataho nga ang pasyente hangtod ning pagsuwat wa pa makahatag bisan sa pasiunang bayad sa tambalanan.
Ang inahan sa pasyente nitumbok nga wa siyay trabaho ug ang iyang anak nga maoy anaa sa tambalanan wa nay ikabayad sa ilang responsibilidad busa gipugngan si Aurora nga makagawas sa hospital.
Bisan sa awhag nga makagawas ang pasyente uban sa pasalig nga ilang wa pa mabayri nga responsibiliad sa hospital ilang bayranan pinaagi sa “installment” bisan ang iyang mga doktor ni-advise nga makagawas na siya apan ang tambalanan padayong nipatuman sa ilang palisya nga “no full pay, no release.” (JECT)