GILANGKAT sa University of the Visayas (UV) Green Lancers ang ikasiyam nilang sunodsunod nga titulo pinaagi sa 75-62 nga kadaugan batok sa University of Cebu (UC) Webmasters kagabii sa Game 4 sa Cebu Schools Athletic Foundation Inc. (CESAFI) college division best-of-five championship series sa Cebu Coliseum.

Ning higayuna, gipamatud-an sa Green Lancers nga kaya gihapon nilang maghari bisan wala ang dominasyon ni 7-footer Greg Slaughter ug nakakita sila’g bag-ong bayani – ang rookie nga si Emmanuel Calo.

"The Manny Pacquiao Blog". Click here for stories and updates on the Filipino boxing champ.

Si Calo nagmangtas sa 4th quarter ug nihipos kini’g sunodsunod nga puntos nga maoy nagtukmod sa Green Lancers nga humanon og sayo ang series, 3-1.

Gipangulohan ni Calo ang kadaugan pinaagi sa iyang 21 puntos, 11 niini iyang namugna sa 4th quarter.

“Calo did it for us for the championship. I was just fortunate that we gave a good exposure for him,” matod ni Green Lancers coach Elmer “Boy” Cabahug.

Wala kaayo mosaler sa opensa si Slaugther ug igo lang kining nakahipos og unom ka mga puntos apan ang iyang maayong depensa ngadto sa higante sab nga si 6’10” Junmar Fajardo maoy naghatag og grabeng labad sa ulo sa Webmasters.

Si Fajardo, kinsa naanad nang mopuntos og tag kapin sa 20 puntos, igo lang nakamaneho og pito ka mga puntos gumikan sa grabeng depensa ni Slaughter ngadto kaniya.

Bisan unom ra ka puntos ang iyang nahimo, naangkon gihapon ni Slaughter ang ikaduha niyang sunodsunod nga MVP award.

Gikauban ni Slaughter sa Mythical Team mao sila si Fajardo, Moncrief Rogado sa UC, Chris Diputado sa UV ug Giovannie Padillo sa USC Warriors.

Sa pagsugod pa lang, nakontrolar na gyud sa Green Lancers ang kombati, hinuon wala gyud niya nabiyaan og dako ang Webmasters sa 1st half.

Pag-abot ni Cong. Eddie Gullas, tag-iya sa UV, sa 4th quarter nagbangis na gyud ang Green Lancers sa pagpangulo ni Calo ug sayon na lang gyud kaayo alang kanila ang duwang basketball.

Nakighugpong si Calo nila ni Harold Cincoflores, Slaughter, ug Ritchum Dennison aron inaton ang ilang labaw ngadto sa 66-46 nga labaw sa nahabiling 4:04 minutos.

Gikan niadto, gipang-isa na’g sugod sa ga dumadapig sa Green Lancers ang banners nga adunay unod nga nagsaad sa ikasiyam nga kampiyunato sa Green Lancers.

Niadtong higayuna, tatawng niisa na sab sa ilang bandera ang Webmasters ni coach Rhoel Gomez.

“As long as the blessings come to us, dili mi moundang. If it will stop, we will continue again,” dugang ni coach Cabahug.

Puntos kada usa

UV (75)- Calo 21, Cincoflores 15, Dennison 10, Cabahug 6, Slaughter 6, Lasala 4, Mercader 4, Olivares 4, Manigque 3, Diputado 2

UC (65)- Rogado 13, Tano 12, Juliane 9, Mohamad 7, Fajardo 7, Quilantang 5, Cayanong 4, Luceno 3.