NINGKULIT og kasaysayan ang M.Lhuillier Kwarta Padala-Cebu Niños human nila gilangkat ang korona sa Zamboanga City leg pinaagi sa 91-81 nga kadaugan batok sa higpit nilang karibal nga Misamis Oriental Meteors sa miaging gabii sa 2009 Smart Liga Pilipinas Conference III sa Summit Centre sa Universidad de Zamboanga.

Ang Niños ni coach Ral “Yayoy” Alcoseba ug team owner Michel Lhuillier napatik sa kasaysayan sa liga isip labing unang team nga wala gyud nakatilaw’g pilde sa tanang leg tours nga ilang giapilan sulod sa 16 ka mga duwa.

Sun.Star accepts donations for victims of Typhoon Ondoy

Moabante ang Niños sa Super Leg isip no.1 team nga seguradong makapaburot gyud og insakto sa ilang moral. Ang Super leg sugdan sa ulahing bahin ning buwana.

Si Ariel Mepaña, kinsa nag-average lang og upat ka puntos sa elimination round, kalit lang nagmangtas ug gipangulohan niya ang kadaugan pinaagi sa iyang 19 puntos unya maayo sab nga nakaduwa si Mark Magsumbol ug niamot kini’g 16 puntos.

Ang Meteors ni coach Jun Noel gipangulohan ni Eder Saldua pinaagi sa iyang 28 puntos apan ang usa sa ilang mga sinaligan nga si Patrick Cabahug igo lang mihipos og 13 puntos, nga layo-layo ra gyud sa 23.3 puntos nga average niini sa elimination round.

Sa laing bahin, ang EKB-Apayao Rapids ningmakmak sa host Zamboanga Uno Latinos, 105-84, aron angkunon ang ikatulong puwesto sa Zambo leg.

Ang Niños nakadiretso na’g sulod sa Super Leg diin ilaha unyang ikauban ang no.2 team, nga ning puntoha wa pa masayri kon unsa nga team ang makakuha.

Ang no.3 team hangtod no.8 mosubay pa sa wildcard phase. Ang parisan sa wildcard phase mao ang tali no.3 batok no.8, no.4 batok no.7, ug no.5 batok no.6 diin ang team nga mas taas og ranggo adunay twice-to-beat nga bintaha.

Ang tulo nga molusot sa wildcard phase mao ang makig-uban sa top two teams alang sa Super leg.

Puntos kada usa:

First game:

Apayao (105) – Junio 23, Navarro 15, Robles 13, Bonus 13, Cruz 11, Vitug 10, Dizon 6, Santos 6, Cabico 4, Bumanglad 2, Lustestica 2, Yambao 0, Evangelista 0, Ebuen 0, Villareal 0.

Zamboanga (84) – Rebollos 25, Bolias 21, Concepcion 16, Graebel 7, Merced 6, Necesito 5, Lozano 4, Navarro 0, Yap 0. Period Scores: 11-22, 45-54, 79-69, 105-84.

Second game:

Cebu (91) – Mepana 19, Magsumbol 16, Padilla 14, Enriquez 10, Saladaga 10, Basco 9, Santos 6, Poligrates 3, Nailon 2, Dacia 2, Ababon 0. MisOr (81) – Saldua 28, Cabahug 13, Misa 13, Daja 9, Lamocha 6, Mamaclay 5, Barcellano 3, Butel 2, Sanchez 2, Clavel 0, Moreno 0, Guiyab 0. Period Scores: 16-18, 42-34, 66-58, 91-81. (Liga Bureau)