PATAY na nga niabot sa tambalanan ang usa ka piniriso human maghikog sulod sa kasilyas sa police station kagahapon sa buntag.

Nadiskubrehan ang biktima nga nagbitay nga nagluhod sulod sa CR sa Presento Singko sa Mandaue City Police Office (MCPO) nga nahimutang sa Barangay Opao.

Sun.Star accepts donations for victims of Typhoon Ondoy

Ang nagpakamatay mao si Armando Caballes, 31, taga Barangay Quiot.

Si Caballes natanggong sa bilanggoan sukad pa niadtong Oktubre 30, human siya gitumbok nga nalambigit sa pagpangulata ug pagkuha sa alahas sa usa ka batan-on nga taga Umapad, Mandaue.

Pipila ka mga saksi ang mitumbok kang Caballes hinungdan nga gidakop siya sa mga barangay tanod ug napasakaan og kaso nga robbery with physical injury niadtong Martes.

Apan kagahapon, si Jun Mark Cabato-an, kabanay sa biktima sa pangulata, nibisita sa police station sa wa pa maghikog si Caballes.

Ang inahan ni Cabato-an nakombinsir nga way apil si Caballes sa maong hitabo hinungdan nga nakahukom ang ilang pamilya nga iatras ang kaso nga ilang gipasaka sa hukmanan.

Human sa ilang sabot-sabot, gipasulod pagbalik sa prisuhan si Caballes, apan wa magdugay nanawag siya kang SPO1 Reynaldo Urot ug nipahibawo nga mogamit sa CR
kay naglain ang iyang lawas.

Wa pay singko minutos, gipabalik sa iyang selda si Caballes apan nanawag na usab siya kay naglain gihapon ang iyang lawas.

Gipagawas ni SPO2 Urot ug gipabalik sa CR kuyog si SPO2 Danilo Barisa.

Apan nahibulong sila nga lapas singko minutos wa pa makagawas sa CR si Caballes, hinungdan nga ilang gisangpit aron mogawas sa CR.

Wa gihapon kini motubag hinungdan nga giablihan ni Barisa ang CR ug didto na makita ang biktima nga nagluhod nga gipatoay ang iyang liog sa sweatshirt nga iyang gisul-ob nga gihigot sa bahin sa CR.

Gitawagan sa mga pulis ang mga sakop sa Eruf ug gisuwayan sa pagsalbar ang biktima.

Dali nila kining gidala sa tambalanan apan gideklarar nga dead on arrival.

Dugang nasayran sa kapulisan nga magkanunayan og duaw sa presento ang agawon ni Caballes.

Apan ang iyang banay ug mga paryente wa gyud mopakita sukad nga nabilanggo si Caballes.

Nahibulong usab ang kapulisan ngano nga naghikog si Caballes nga gipasaylo na man unta siya sa complainant human makombinsir nga wa siyay apil sa maong hitabo.