Piniriso sa Talisay naghikog sa selda

Wednesday, September 1, 2010

PRISO sa Talisay City police station naghikog-patay sud sa selda samtang nangatulog ang iyang mga kauban pasado alas 11:00 sa miaging gabii.

Gamit ang sinumpay sumpay nga panapton, gihigtan ni Cielo Hernani Bacus,19, taga Mananga, Tabunok, Talisay City ang iyang liog ug ang pikas tumoy didto sa puthaw nga kisame.

Have something to report? Tell us in text, photos or videos.

Updates on President Benigno Aquino III's presidency

Ang kauban nga priso nga si Jun Agwanta nagkanayon nga sa wa pa sila mangatulog, iyang nakit-an si Bacus nga nagsumpay sumpay sa  panapton ug gisuway sa paghigot sa liog niini.

Gipangutana ni Agwanta si Bacus kon maghikog ba kini apan nagtuo lang siya nga komedya ra kadto.

Samtang mingaw na ang palibot,gitinuod ni Bacus ang iyang plano ug naghikog kini nga nagtugsad ra ang tiil sa semento apan gitikungkong.

Ang jail guard nga si SP03 Cleofas Bonjoc nibutyag nga nakadungog siya nga dunay nitig-ik sa sud sa selda.

Si Agwanta nga nakamata nisyagit sa iyang nakita nga naghikog ang iyang kauban hinungdan nga dali nga gidala sa mga pulis ang biktima sa Talisay District Hospital apan gidiklarar kini nga patay na.

Laing kauban nga priso nga si Jomar Castro nibutyag nga nakadungan niya og panihapon ang biktima ug masulob-on kini kay wa gyuy niduaw nga iyang mga paryente sukad siya mapriso.
     
Si Bacus napriso tungod sa kasong pagkawat sa usa ka motorsiklo apan nasakpan sa tag-iya niadtong Agusto 25.

Gumikan sa maong hitabo, sila si SP03 Bonjoc ug P02 Jaime Abellana nga mga jailer andam mopaubos sa imbistigasyon kon duna may himuon.

Matod ni Bonjoc nga estrikto sila sa pagpasud sa mga priso sa detention cell tungod kay ila man gyud kini nga did-an sa pagpasud og mga butang nga makahatag og hulga sa kinabuhi sa mga nabilanggo.

“Kanang mga bakus ug ubang butang nga gidili sud sa selda amo gyud na nga tsik-apon sa di pa makasud sa selda,”matod ni Bonjoc.(VLM)