PULITIKA ang gituohan sa pamilya sa gipatay nga bana sa kapitan sa Barangay Cantao-an, City of Naga nga motibo sa pagpamusil niadtong Sabado sa gabii dihang paingon na silang mamauli.
Gikan nga nitambong sa victory party sa grupo ni Mayor Valdemar Chiong sila si kapitan Fe Godoy ug ang iyang bana nga si Florante,40 dihang gisundan ang ilang sakyanan sa usa ka motorsiklo nga gisakyan sa tulo ka wa hiilhing mga lalake.
Si Florante naigo sa wang bahin sa kilid sa dughan hinungdan sa iyang kamatayon.
Ang iyang asawa nga si kapitan Fe nikompirmar nga sa miaging eleksyon, duna gyud silay gikasungi nga mga tawo ug giadto gyud gani sa iyang bana.
Apan ang hepe sa kapulisan sa Naga nga si Supt. Henry Biñas wa pa gyud hingpit motuo nga pulitika ang motibo sa pagpamusil.
Matod ni Biñas, tanang anggulo ang ila karon nga gitun-an sa nagpadayon nga imbestigasyon.
Gibutyag sa hepe sa kapulisan nga padayon karon ang gihimo nila nga manhunt operation batok sa wa hiilhing mga mamumuno. (VLM)