OPISYAL sa Dangerous Drugs Board (DDB) nanawagan sa mga pampubliko ug pribadong mga buhatan nga ipaubos sa random drug test ang ilang mga empleyado aron mapatud-an nga drug-free ang ilang mga buhatan.

Ang hagit giluwatan ni DDB Vice Chairman Clarence Paul Oaminal subay sa Drug Prevention and Awareness Week.

Apan aron dunay ehemplo ang mga pribadong opisina, matod ni Oaminal nga ang angayang unang mopatuman niini mao ang mga buhatan ug ahensiya sa gobyerno.

Sun.Star accepts donations for victims of Typhoon Ondoy

Ubos sa article V sa Republic Act 9165 kun Anti-Dangerous Drug Act sa nasod, gilatid niini ang pag-promote sa mga buhatan, gobyerno man o pribado, nga drug-free, uban sa pag-abag sa Department of Labor and Employment (Dole).

Matod ni Oaminal, dunay legal basis ang pagpatuman sa drug test kay gilatid sa article 2, section 36 sa maong balaod nga ang mga opisyal ug kawani sa pampubliko ug pribadong buhatan kinahanglang mopaubos sa random drug test diin ang ilang kompanya ug amo ang kinahanglang moabaga niini.

Tumong niini, matod ni Oaminal nga masiguro nga way mga kawani nga drug addict nga posibleng makahulga sa uban pang mga kawani.

Ang kawani nga mapatud-ang nigamit og drugas, kinahanglan usab nga silutan depende sa palisiya sa pribadong kompanya.

Hinuon, dunay mga government agency ug ubang local government unit (LGU) nga nipatuman og random drug test, apan matod ni Oaminal nga daghan pa gihapon ang wa motuman niini.