ANG 3rd District Office sa Department of Public Works and Highways (DPWH) mohimo og mga proyekto aron kalikayan ang lain na usab nga disgrasya sa Brgy. Cansomoroy, lungsod sa Balamban, Sugbo.
Ang proyekto gibana-bana nga mogasto og P8 milyones alang sa pagtukod og concrete retaining wall ug pagpalapad sa dalan sa dapit nga nahitaboan.
Si District Engineer James Delosa nga nahinabi sa Sun.Star Superbalita, niingon nga nag-andam na siya og program of work.
Iya kining iduso ngadto kang Regional Director Josefino Rigor alang sa approval ug iduso ngadto sa ilang ulohan nga buhatan.
Ang concrete retaining wall may gihabugon nga 2 metros gikan sa yuta ug usa ka metro ang gibag-on.
May gilapdon kini nga 30 ngadto sa 50 metros nga gibana-bana nga mogasto og P3 milyones.
Girekomendar usab ni Delosa nga palapdan ang dalan sa Sitio C pinaagi sa pagdugang og 5-8 meters ang gilapdon ug may gitas-on nga 100 meters.
Gibana-bana nga mogasto kini og P5 milyones. Matod pa ni Delosa nga pinaagi sa concrete retaining wall, mapugngan ang mga sakyanan nga mahulog sa pangpang kay igo lang kining mobangga sa concrete retaining wall kon di malikayan ang disgrasya. Ang pagpalapad usab sa dalan sa dapit makatabang nga malikayan ang disgrasya.
Ang pagtukod sa maong mga proyekto molanat og labing minos duha ka mga buwan.
Malaumon si Delosa nga magahinan og salapi sa ilang ulohan nga buhatan ang maong mga proyekto aron malikayan ang lain na usab nga disgrasya.
Dugang pa niya nga maghimo usab sila og samang mga proyekto sa ubang bahin sa Transcentral Highway, apan nagkinahanglan kini og dakong kantidad sa salapi.
Gibutyag usab ni Delosa nga gikinahanglan nga mopasar og balaudnon ang Konseho sa lungsod sa Balamban ug konseho sa siyudad sa Sugbo nga nagdili pagpasulod sa Transcentral Highway sa mga de pasaherong bus ug tourist bus, ilabi na sa mga sakyanan nga karaan na ang modelo ug depektuso.